Бәйрәмнәрдә артистлар баеганмы?

Гавам халкы артистларны чумырып акча эшләүче һәм шуның барәбәренә типтереп яшәүче бер төркем итебрәк күзаллый. Шайтан башка, җен башка дигәндәй, коры җирнең зур өлешен алып торучы Россиянең якты йолдызлары өчен, ягъни Мәскәүдән чыгып китеп, бөтен илне айкап йөрүче сәнгать әһелләре өчен бу чыннан да шулайдыр.

Бюджет өлкәсендә эшләүче Татарстан артистлары Мәскәүнекеләр кебек типтереп яши, дип әйтеп булмас иде. Бәлкем, мин ялгышамдыр...

Чаллы татар дәүләт театрының баш режиссеры Фаил Ибраһимов: “Театрдан тыш читтә эшләргә ярыймы?”, - дип сораган бер актерына: “Эшләгез, эшли генә күрегез. Диктор булып утырасызмы, туй алып барасызмы, концертмы, бер сүзем дә юк. Тик исән генә булыгыз! Миңа сезнең исән булуыгыз кирәк”, - дип җавап биргән диләр.

Гавам халкы артистларны нәкъ менә яңа ел көннәрендә “урак өсте” ясыйлар, ягъни сәмән сугалар, дип тә уйлый. Чынлыкта ничек соң? Яңа ел тамашалары узды. Яңа ел алды көннәрендә һәм 2012 елның тәүге атнасында төрле оешма бәйрәмнәре, корпоративлар шаулап-гөрләп узды. Билгели ки, аларның берсе дә җыр-моң, уен көлкедән башка узмый, димәк музыкантлар, артистлар биредә дә вакыйга үзәгендә.

К.Тинчурин исемендәге Татар дәүләт драма һәм комедия театры коллективы декабрьнең 24еннән алып гыйнварның 9ына кадәр балалар өчен Шамил Фәрхетдиновның “Али баба һәм өч карак”, “Шүрәле-онлайн” һәм “Шым-шым” маҗаралары” исемле әкиятләр күрсәтте. Бирегә килгән балалар башлыча 100 сумга әкият һәм фойега куелган бәйрәм Чыршысы тирәли Кыш бабай, Кар кызы, төрле әкият геройлары белән күңел ачты. Мондый бәйрәмнәрнең балалар өчен күңелле булуын искәртсәләр дә, алар матди яктан театр өчен бик файдалы дип авыз тутырып әйтүче табылмады. Татарның атаклы драматург исемен йөртүче театр үзенә 425 тамашачыны кабул итә ала. Театрда барлыгы 18 тамаша уйналуын исәпкә алсак, җидейөз мең сумнан артыграк табыш кергәне шәйләнә.

М.Җәлил исемендәге опера һәм балет театры иҗади коллективларның барысын да уздырып эшли дисәк тә, ялгыш булмас. Елның елы алар нәни тамашачыларга гына түгел, аларның әти-әниләренең күңеленә дә хуш килерлек яңа ел спектакльләре әзерли. Бу юлы опера һәм балет театры коллективы үз тамашачыларын ерак Африкага сәяхәт кылдырды. Әлеге сәяхәтне алар шәһәрнең хореография училищесы студентлары ярдәмендә оештырды. Кышкы каникуллар вакытында биредә атаклы әкиятче Корней Чуковскийның әсәрләренә нигезләнеп эшләнгән “Доктор Айболит” әкияте тәкъдим ителде. Тамашалар башланганчы ук билетлар сатылып бетте, дип хәбәр иттеләр безгә театрдан. Балет-әкиятне шыгрым тулы залларда 30 декабрьдән 8 гыйнварга кадәр барлыгы 19 тапкыр күрсәткәннәр. Билет бәяләре 100-300 сум тәшкил иткән. Бу төр сәнгатьнең катлаулы һәм үзенә күп чыгымнар соравын исәпкә алсак, театр коллективы баеп киткән, дип әйтеп булмый билгеле. Ләкин башка коллективлардан аермалы буларак, әкият-балетны яшь артистлар хәттә 31 декабрь көнне дә биегәннәр. Безнең күзаллаулар буенча, Яңа ел бәйрәмнәрендә театр өч миллион ярымга якын акча эшләгән булып чыга.

“Корстон” сәүдә күңел ачу үзәге дә бәйрәм вакыйгаларыннан читтә калмады.

“Смешарики в стране Корстон” тамашасында 2-10 яшьлек балаларның күңелен Мәскәүдән килгән артистлар күргән. 2-7 гыйнвар көннәрендә өчәр тапкыр  оештырылган бәйрәмнең беренче көннәрендә бәйрәмгә эләгү өчен 600 сум (Мәскәү артистлары чыгыш ясый бит!) түләгән булсалар, соңрак 500 сумга да керергә мөмкин булган, дип хәбәр иттеләр “Корстон”да. Тамаша көннәрендә ничә билет сатылганны сер булып калды.

“Әкият” курчак дәүләт театры бәйрәм сезонын 23 декабрьдә үк ачып җибәргән  иде. Яңа ел әкиятләре 8 гыйнварьга кадәр көненә өчәр мәртәбә куелды.  Бинаның уңайсыз, иске булуына да карамастан, тамашачы бирегә бик теләп йөрде. Курчак театры һәрбер яңа ел тамашасына 258шәр билет саткан. Билет бәяләренең 200-270 сумны тәшкил итүе дә әти-әниләрне куркытмаган. Шулай итеп, бәйрәмнәрдә курчаклылар якынча ике миллионнан артык керем алган булып чыга. Ял көннәрендә хезмәт куйган театрның иҗат коллективына премия һәм 18 гыйнварьга кадәр ял бирдек, дип хәбәр иттеләр курчак театрыннан.