Күрәсем килгән иде...

22 һәм 23 нче декабрь көннәрендә кич 18 сәгать 30 минутта Кәрим Тинчурин исемендәге Татар дәүләт драма һәм комедия театры Исламия Мәхмүтова әсәре буенча куелган “Күрәсем килгән иде...” мелодрамасының премьерасын күрсәтә.

Спектакльне сәхнәгә Россиянең атказанган, Татарстанның халык артисткасы Исламия Мәхмүтова куйды. Рәссамы Альберт Нестеров, композиторы Чыңгыз Абызов, Хореографы Чулпан Закирова (Татарстанның атказанган артисткасы).

Спектакльдә катнашалар:

Россиянең атказанган, Татарстанның халык артисткасы - Исламия Мәхмүтова.

Татарстанның халык артистлары – Хәлил Мәхмүтов, Зөләйха Хәкимҗанова, Нуретдин Нәҗмиев, Резедә Төхфәтуллина.

Татарстанның атказанган артистлары – Люция Галләмова, Лилия Мәхмүтова, Ренат Шәмсетдинов.

Артистлар - Рөстәм Гайзуллин, Гүзәл Гайнуллина, Харис Хөснетдинов, Ирек Хафизов, Гөлчәчәк Хафизова, Ислам Хафизов.

Ир белән хатын, үз балалары булмау сәбәпле, ятимнәр йортыннан уллыкка ташландык бала ала. Бу адым барысының да күңеленә хуш килә: әби-бабай да, туганнар да яңа гаилә әгъзасы пәйда булуына сөенеп туя алмый. Бала йортка куаныч, бәхет китерә. Ләкин Алмаз үсеп буйга җиткәч очраклы рәвештә үзенең балалар йортыннан алынганлыгын белә. Һәм ул чын әти-әнисен күрү теләге белән яна башлый...

Тапкан гына анамы, әллә төн йокыларын калдырып бакканы дамы?

Спектакльне карагач әлеге сорауга җавапны һәркем үзе табар.

Спектакль 2 сәгать 05 минут бара.