|
|
Бүген кемнәр туган
|
|
Архив
|
22.11.2011 Җәмгыять
Кыш Бабайдан нәрсә сорар идегез?Кичә Россиядә рәсми рәвештә Кыш Бабайның туган көнен билгеләп үттеләр. Аның туган ягы булып саналган Бөек Устюгта бу көнгә ныклап әзерләнгәннәр. Нәкъ 18 ноябрь көнне анда Кыш Бабай почтасы эшли башлый. Һәр теләгән кеше кышкы тылсымчыга туган көне белән котлап яки Яңа елга бүләк сорап хат юллый ала. Ә сез Кыш бабайдан нәрсә сорар идегез? Роберт МИҢНУЛЛИН, Татарстан Дәүләт Советы депутаты:
– Татарның үз Кыш Бабае булмаса да, без әлеге бәйрәмне зарыгып көтеп алабыз. Ул киләчәккә якты өметләр алып килә бит. Алданырга яраткангадыр, аңа теләкләр белән мөрәҗәгать итәбез. Балачагымда аннан матур-матур уенчыклар, тәмле-тәмле ризыклар сораганым истә. Хәзер инде кыйммәтләр үзгәрде. Илгә тынычлык, иминлек алып килсен, дибез. Яңа ел – гаилә бәйрәме бит ул. Шуңа иң беренче булып нәкъ якыннарыңны кайгыртасың да инде.
Анелия ЛАТЫЙПОВА, Татарстан Финанс министрлыгы Казначылык департаменты әйдәп баручы киңәшчесе:
– Әйбәт сорау. Кыш Бабай минем теләкләремне тормышка ашырырлык кодрәтле зат түгел шул. Яраткан кешеләремә саулык, мохтаҗларның тормышын яхшыртып, йортсызларга йорт бүләк итә алмавын исәпкә алсак. күп дигәндә, бүләк өмет итеп була. Үзем өчен видеокамера сорар идем. Туганнарың, дусларың белән үткәрелгән кабатланмас тормыш мизгелләрен тотып алып, еллар үткәч, аларга янә әйләнеп кайту мөмкинлеге үзе ни тора бит!
Ранил ХӘЙБУЛЛИН, Казан шәһәренең 19 чны төзәтү колониясе хезмәткәре:
– Бүгенге тормышта сорый торган нәрсәләр күп инде ул: машина, фатир, яхшы эш урыны (хезмәт хакының яхшылыгын истә тотып әйтүем). Фатиры берәр чит илдә булса, тагын да яхшырак. Ә чынлап әйтсәк, үзең тир түкмәсәң, беркайчан да кеше була алмаячаксың. Кешедән сорап, кешегә ышанып йөри торган заманалар бетте. Хәзер олыларны түгел, 5 яшьлек баланы да Кыш Бабай белән алдап булмый.
Алинә САФИУЛЛИНА, җырчы:
– Бәхет сорар идем. Ә бәхет өчен күп кирәкми: үзем һәм якыннарым исән-сау булса, тормышлар имин булса, яшисе дә яшисе. Иң мөһим нәрсә шул бит дөньяда. Матди әйберләргә килгәндә исә, диңгез яры буенда йорт салып бирсә, бер дә каршы килмәс идем анысы.
Ләйсән ГАТИНА, Казан дәүләт медицина универститы студенты:
– Чын ир-ат сорар идем. Ник дисәгез, хәзерге егетләр никтер вагайды, тормыш тоткасы булырдайлары юк диярлек. Бар нәрсәне хатын-кыз җилкәсенә ташлап калдыралар да, тормыш авыр, дип зарланып яшиләр. Кыш бабай минем теләгемне тормышка ашырсамы, мин дә ирләр эшли торган иң авыр йөкне үз өстемә алыр идем: көне буе диванда ятып телевизор карауны әйтәм. Әйе, авыр, тик нишлисең бит, бу дөньяда эшнең авырын да башкара белергә кирәк.
|
Иң күп укылган
|