Хастаханәне барыбер яптылар

СССР таркалган чорда мин, Похвистнево районының Гали авылында яшәүче Шәфигулла Хәмидуллин, үзебезнең хастаханәгә дәваланырга яттым. Шул дәвердә тирә-яктагы авыллардагы өч хастаханәне ябып куйганнар иде инде. Беркөнне без яткан стационарга да өч кеше килеп керде. Икесе палатабызга кереп, ниндидер акт язарга тотынды. “Ни эшләп йөрисез?” - дигән соравыма: “Хастаханәне ябарга булдык”, - дип җавап бирделәр. Караватымнан сикереп торып, кызуланып, ризасызлыгымны белдерергә керештем.

Бер-ике көннән баш табиб Доронина кереп, кем тавышланганы турында сораша башлады. Шуннан соң ул: “Заманасы шул, нишлисең бит, хастаханәне ябарга туры килә. Ремонт ясатмый торып, эшне алып барырга рөхсәт юк. Түбә ябарга складта калай да бар, тик эшләтергә генә кеше дә, акча да юк”, - дип зарланды. Бездә ул вакытта әле ике колхоз, ике авыл советы эшләп тора иде. Мин алардан ярдәм сорарга киңәш иттем.

Бер атна да үтмәде, без баш табиб белән икәү Рысайкинога ярдәм сорап килдек. Үтенечебезне кире кактылар. Тәрҗиев исемендәге колхоз рәисе Халит Йосыпов та, үзебез дә банкрот хәлендә дип, кире борып җибәрде. Гали авылы советы рәисе Ильяс Баһаутдиновта да акча булмады.

Ильяс Баһаутдинов һәм сатучы Фәнүзә Вәлиева киңәше буенча авылда җыелыш уздырырга булдык. Халык күп килде. Хастаханәне ремонтлау өчен акча бирергә дип кул күтәрүчеләр 100 процент булды. Беренче чиратта авылыбызның өч мәчете зур ярдәм күрсәтте. Һәр йортка кереп тә акча җыеп йөрдек. Кем күпме булдыра, шул кадәр бирде. Тиздән хастаханә мөдире Мәрвәр Латыйпова эшчеләр яллап, стационарны ремонтлауга кереште.

Эшчеләр бригадасы җитәкчесе Минһаҗев миңа эшләгән эшләрен күрсәтеп йөргәндә, Гаязов фамилияле бер кеше истәлеккә дип калай кисәге китереп тоттырды һәм эш биргәнем өчен бөтен бригада исеменнән рәхмәт әйтеп, исәнлек-саулык теләде.

Йомшак агачны корт баса, диләр. Бу хәлләрдән соң ике ел узгандырмы, Мәрвәр ханым мине тагын чакыртты. “Синең белән сөйләшергә телиләр”, - дип, безнең хастаханәгә баш табиб итеп җибәрелгән Темникова фамилияле табиб белән таныштырды. Стационар тирәли коелган койма авып беткәнгә, ул аны ремонтлатырга тели икән. Шуңа акча җыюны миңа йөкләде. Каршы килмәдем инде.

Без рус милләтендәге табибка озын күлмәк кидереп, башына яулык бәйләттек тә, янә мәчетләребезгә ярдәм сорарга киттек. Рәхмәт яугыры, бу юлы да булыштылар, халыктан да акча җыелды. Ике мең сумга кирәкле материаллар алып кайттым һәм эш башланды. Хастаханәбезнең илле еллык юбилеен матур койма белән каршыладык. Рәхмәт, мине дә бу бәйрәмгә зурлап чакырдылар.

Тик шулай да без стационарыбызны саклап кала алмадык. Аны ябу эшләре башлангач, ике шәфкать туташы миңа йөгереп килделәр, тик мин ул вакытта авырап, урын өстендә ята идем. Шулай да, 300 кешедән имза җыеп, риза түгеллебезне белдердек. Шулай да эш барып чыкмады, 15 кешелек хастаханәбезне ябып куйдылар.