Бүген Филүс Каһировның туган көне!

Башкортостан Республикасының Бүздәк районы Килем авылында туып үскән Филүс Каһиров бүген үзенең туган көнен билгеләп үтә. Аңа – 25 яшь! Нибары 25 яшь! Ә бит Филүс Каһиров бүгенге көндә - республикабызның, халкыбызның иң мәртәбәле җырчыларының берсе. Халкыбызның зыялы, затлы җырчысы. Аны хаклы рәвештә Рәшит Ваһапов, Илһам Шакиров, Хәйдәр Бигичевларның лаеклы дәвамчысы дип атыйлар.

Филүс – Рәшит Ваһапов исемендәге халыкара татар җыры фестиваленең гран-при иясе. Узган ел “Гәлсәр сандугач” фестивалендә “Башкортостанның ел җырчысы” дигән исемегә лаек булды. Быел исә Ф.Каһировка Татарстан дәүләтенең югары бүләге – М. Җәлил исемендәге Республика премиясе тапшырылды.

Ф.Каһиров Казан дәүләт консерваториясен тәмамлады, хәзер исә шунда ук аспирантурада укуын дәвам итә.

25 яшьлек Филүс Каһиров быел Казан тамашачысына 5-нче концерт  программасын тәкьдим итәчәк. Концерт 22 декабрьдә республикабызның иң затлы залларының берсе булган – М.Җәлил исемендәге опера һәм балет театрында үтәчәк.

Без Филүсне ихлас күңелдән туган көне белән котлыйбыз! Исәнлек -саулык, озын гомер, яңа иҗат унышлары сиңа, Филүс!

Рәшит Ваһапов исемендәге татар мәдәнияте фонды.