Өйләнәсең килсә, «Шәрык»ка кил!

Татар Иҗтимагый үзәге бинасында урнашкан «Шәрык» йорты ел саен яңарып-яшәреп тора. Милли җанлы, иманлы яңа буын татар яшьләре аңа һәр елны яңа сулыш өрә, яңа идеяләр алып килә. Шул ук вакытта бирегә йөрүчеләр элеккеге йолаларына да тугры булып кала бирә. Менә быел да ул, җәй булуга карамастан, гадәткә кереп өлгергән ифтар марафонында катнашкан, төрле сәфәрләргә чыккан.

 «Әле сентябрь ае кереп студентлар күпләп җыела алмаганга, ифтарлар башка еллардагы сыман ай дәвамында түгел, ә чәршәмбе кичләрендә генә оештырылды, шулай да мәҗлесләр гөрләп узды. Табын артына җыелышып, Коръән аятьләре укып, догалар кылдык. Безгә иманлы егетләр, дини кызлар күп йөри. Быел егетләр ифтарларга аш пешереп килүләре белән дә бик гаҗәпләндерде. Элегрәк тә «Шәрык»та Тимур пешергән коймакларны яратып, мактап ашый торган идек. Рифат белән Ринатның да куллары аш-суга оста икән», – ди «Шәрык» клубына 2009 елдан бирле йөрүче иң актив лидерларның берсе Эльмира Бәйрәмова.

«Шәрык»лылар элеккеге тугры дусларын да онытмый, аларны әледән-әле төрле чараларга чакыра. Менә быел яз көне, Тукай елы белән беррәттән, «Шәрык» клубының барлыкка килүенә 105 ел тулуны да билгеләп үткәннәр. Шунда «Шәрык»та кунак булып, яшьләр белән аралашып киткән татар эстрадасының яшь җырчылары да бушлай концерт биргән. Һәрвакыт кунакчыл-дустанә мөнәсәбәтләр хөкем сөргән «Шәрык» йортына Илназ Сафиуллин, Илназ Гарипов, Альбина Зиннурова, Миләүшә Сафина һ.б. кебек яшь башкаручылар һәрдаим килеп, хәл белешеп тора. Арада Зөлфәт Зиннуров һәм Иделия кебек кайчандыр үзләре «Шәрык» активисты булган җырчылар да бар. «Шәрык» йорты иҗатчыларыбыз белән һәрвакыт элемтәдә тора, яшьләрне милли мохиткә тартып кертә һәм күңелен үстерергә канатлар бирә. Бирегә яшь журналистлар, шагыйрьләр, төрле ВУЗларда белем алучы татар яшьләре даими йөри. Монда һәркемне ачык йөз белән каршы алалар, табын түренә утыртып, милләтебезнең күркәм гадәте буенча чәй белән сыйлыйлар. «Шәрык», зур бер гаилә булып яшәү урыны булудан тыш, егет-кызларга бер-берсен табу, парлашу өчен дә менә дигән урын. Соңгы елларда биредә танышып, гаилә корып җибәргән яшь парлар да артып тора. Бу сезонда өйләнешәчәк «шәрык»лылар аеруча күп. Димәк, клуб, аралашу функциясе белән генә чикләнмичә, татар гаиләләре барлыкка китерү кебек изге бурычны да башкара.

Ә яңа сезон ачылуга килгәндә, энтузиастлар тырышлыгы белән эшләүче бу милли учак 14 сентябрь көнне традицион Ачык ишекләр көнен үткәрә. Бирегә беренче тапкыр килгән яшьләр клубның үткәне, бүгенгесе һәм киләчәге белән таныша ала. Шулай ук үзләренең эшлекле тәкъдимнәре белән чыгучыларны да монда игътибарсыз калдырмыйлар. Кем дә булса берәр көнне сайлап үз проектын оештырып җибәрергә тели икән, аңа юллар һәрчак ачык. Мәсәлән, быел җомга кичләрендә шундый яңа проектларның берсе эшли дә башлаячак. Бу кичтә сезне биредә бию түгәрәге һәм милли уеннар көтә. Чәршәмбе һәм пәнҗешәмбе көннәрендәге «Иҗат» һәм «Атнакич» проектлары да үз эшчәнлеген дәвам итә. Ә иң мөһиме – бер милләт балаларының үзара аралашып, бердәмләшеп, ярдәмләшеп яшәве, татар җанын, милли рухны саклап калуыбыз!