Әстерханның Яшь тамашачы театры үзенең яңа сезонын Казанда ачып җибәрәчәк

15-19 сентябрьдә К.Тинчурин исемендәге татар дәүләт драма һәм комедия театры сәхнәсендә Әстерханның Яшь тамашачы театры үзенең 78 сезонын ачып җибәрә. Казандагы гастрольләре вакытында әстерханлылар “Синдбад-мореход” (В.Шульжик, Ю.Фридман) һәм “Дядя Федор, Пес и Кот” (Э.Успенский) спектакльләрен күрсәтәчәк.

Әстерханның Яшь тамашачы театры сәхнәсендә хәзерге вакытта бик танылган Б.Невзоров, В.Козел, М.Птащук кебек актерлар уйнаган. Бүгенге көндә дә театр сәхнәсендә Россиянең халык артисты Юрий Кочетков җитәкчелегендәге бик профессиональ труппа эшли.

“Синдбад-мореход” спектаклен Юрий Кочетков, ә “Дядя Федор, Пес и Кот” спектаклен Андрей Радочинский куелышында күрергә мөмкин. Рәссам Валерий Литвинов тарафыннан бизәлгән сәхнә әлеге режиссерларның идеяләрен тамашачыга җиткерергә нык ярдәм итә. Ике спектакль дә яңа образ һәм заманча идеяләр белән баетылып бирелгән.

Юрий Ашаев, Дмитрий Юницкий, Алена Тимофеева, Кирилл Соболев, Елена Ромашкина кебек яшь актерлар сәхнәдә генә түгел, тамашачы залында да уйнаячак. Бу – тамашачылар да әлеге вакыйгаларда катнаша алачак дигән сүз.

Гастрольләр – театр өчен үзенә күрә бер имтихан ул. Тамашачы ничек кабул итәр? Ошатырмы? Аңлармы? Әлеге сорауларга җавап гастрольләр үткәч кенә булачак.

Журналистлар игътибарына:

15 сентябрьдә 15.00 сәгатьтә К.Тинчурин исемендәге татар дәүләт драма һәм комедия театрында әстерхан кунаклары матбугат конференция уздыра. Рәхим итегез!