Пульт кем кулында?

Тынчу бүлмәләрдә эшләүчеләрнең 30 процентыннан артыгы кондиционерлар өчен талаша икән. Якынча 1,6 мең хезмәткәр катнашкан сораштыру әнә шундыйрак нәтиҗәләр ясарга мөмкинлек бирә.

Россиянең үзәк өлешендә инде икенче ел рәттән эссе җәй хөкем сөрә. Ашыгыч ярдәм хезмәткәрләре өчен урак өсте чоры. Узган атнада гына да 15 кеше кояш сугу аркасында табибларга мө­рә­җәгать иткән. Дөрес, былтыр эсседән зыян күргәннәр саны 4 тапкыр артыграк булган. Табиблар фикеренчә, бу кеше­ләрнең эсседә үз-үзләрен ничек тотарга белүе, югары температураларга алдан әзерлә­нүе белән аң­ла­тыла.

Алдан әзерләнү дигәннән, башкала халкы кондиционерларны март аеннан ук ала башлаган. Арбаны кыштан әзерлә, дигәндәй. “Яз көненә 5-7 җиһаз сатсак, хә­зер ике көнгә берне “җибәрсәк” шатланабыз”, – ди кондиционерлар белән сәүдә итү ноктасы сатучысы. Бәя­ләре дә уртача алганда 2-3 мең сумга арзанайган.

Бер караганда, кибеттә чират та юк, бәяләре дә төшкән, ә халык эш урынында кондиционер өчен талаша. Тикшеренүләр күрсәткәнчә, “салкын һава өрдергече”н гадәттә хатын-кызлар бүлешә алмый икән. Ир-атлар бүлмәне ныграк суытырга яратса, нәфис затлар уртача температураны сайлый. 35-44 яшь аралыгындагы хезмәткәрләр кондиционерның бик яхшы эшләвен таләп итә, аз гына җитешсезлек булган очракта да зур гауга куптарырга тора. Халыкның 40 проценты вентилятор ише юк-бар өчен талашып торуны урынсыз, дип тапкан. Ә сораштыруда катнашкан 29 процентның бүлмәсендә әле дә кондиционерлар урнаштырылмаган. Алар салкын су өчен талашмый микән?