Әллә безне кайгырталар, әллә үзләрен

Аракы халык эчемлеге булырга тиеш түгел. Франция­нең Страсбург шәһәрендә узган Россия икътисад форумында финанслар министры урынбасары Сергей Шаталов әнә шулай дип белдерде. Моның өчен спиртка акцизларны арттырырга кирәк – нәтиҗәдә халык “градуслар”дан үзе үк баш тартачак.

Киләсе елдан Россиядә спирт акцизлары бермә-бер кү­тәреләчәк. 2014 елга исә са­лымның әлеге төрен бер литр эчемлек өчен 400 сумга җит­керергә ниятлиләр. 2011 ел­ның 1 гыйнварыннан алар 10 процентка арттырылды инде. Шуңа хәзер иң арзан аракы­ның ярты литры 98 сум тора. Ике елдан аның өчен 200 сум чыгарып салырга туры киләчәк.

Бу реформалар гамәлгә кергәч, ярты литрлы аракы ше­шәсе дәүләт казнасын якынча 180 сумга баетачак. Илдәге “градуслы” эчемлек­ләрнең гомуми күләме турында уйлаганда, Финанслар министрлыгы хезмәткәрләре күзләрендә долларлар уйный булса кирәк: алар, акцизларны арттыру бюджетка өстәмә 315,9 млрд сум керем ките­рергә тиеш, дип фаразлаган иде инде. Шулай, киңәшмәләрнең берсендә министр Алексей Кудрин: “Аракы эчү­че кеше дәүләт өчен бик файдалы – бер шешә бушаттыңмы, димәк, илдәге иҗти­магый проблемаларны хәл итү өчен матди ярдәм күрсәттең”, – дип белдергән иде. Дөрес, хәзер салымны күтәрүне ха­лыкның сәламәтлеге турында кайгырту белән аңлаталар.

Кайгыртуларының тагын бер чагылышы булса кирәк, җомга көнне Россия Дәүләт Думасы халык күп җыела торган урыннарда исерткеч эчемлекләрне сатуны тыю турындагы законны икенче укылышта тикшерәчәк.