KAZANHALAL 2011: «Яңа сыйфат билгесе - хәләл»

19-21 июнь көннәрендә Казанда II KAZANHALAL-2011 Халыкара Күргәзмә-ярминкәсе уза. Әлеге чара III KAZANSAMMIT-2011 Халыкара ислам бизнесы һәм финанслары саммиты кысаларында оештырылган. Ярминкәдә 150 оешма катнашыр дип көтелә. Алар арасында Россия, СНГ дәүләтләре, Көньяк-Көнчыгыш Азия һәм Якын Көнчыгыштан килгән катнашучылар бар. Елдан-ел күргәзмәнең географиясе киңәя бара, зуррак масштабларда үтә.

Быел «Челны-Бройлер», «Казан ит комбинаты», «Пестречинка» кебек ветеран-экспонентлар белән беррәттән «Акашевская кошчылык фабрикасы», Россия кулинарлары Ассоциациясе, «Балтач ит комбинаты», «Барака», «Прополис» һәм башка оешмалары да катнашачак. 
Шулай ук быелгы ярминкәдә Индонезия республикасы илчелеге, Малазиянең «Natures Own Brend» компаниясе, “Казан Хәләл Хаб” дип аталган Россиядәге иң эре хәләл товар һәм хезмәтләрнең дистрибьютор үзәге дә катнашучылар рәтендә.

Экспонентлар арасында хәләл индустриянең уникаль товарлары да тәкъдим ителәчәк. Мәсәлән, индонезиялеләр бирегә хәләл-косметика һәм үзләренең эксклюзив кием-салымы белән киләчәк. KAZANHALAL-2011 ярминкәсенә килүчеләр Малазиядән китерелгән хәләл-товарларны күрә алачак.

Оештыручылар белдергәнчә, күргәзмә барышында хатын-кызлар өчен макияж һәм битне карау буенча бушлай мастер-класслар да үтәр дип көтелә.

Күргәзмәнең беренче көндә, ягъни якшәмбе, Спорт сараенда зур шоу-программа оештырачаклар. Аның кысаларында төрле иҗади берләшмәләрнең чыгышлары булачак.

Шулай ук ярминкәдә ябык презентиция мәйданчыклары да булдырылган. Күргәзмә эшләгән ике көндә биредә товар җитештерүчеләр һәм эре сәүдә челтәр җитәкчеләре арасында рәсми килешүләр төзеләчәк. Аерым кызыксынучылар өчен финанс, туристик, медицина һәм мөхәрирлек хезмәтләре тәкъдим ителә.

KAZANHALALнең соңгы көндә исә хәләл индустрия форумы узачак. Форумның төп темалары - әлеге юнәлешнең үсеш перспективасы, стандартизация, логистика һәм маркетинг.

Күргәзмәнең бурычы — Хәләл продуктларны заманча экологик шартларга туры килүче сәламәт ризык буларак таныту.

KAZANHALAL экспонентлары белдергәнчә, әлеге ярминкә Россиядә хәләл индустрия үсеше өчен яңа киңлекләр ача.

KAZANHALAL-2011 ПРОГРАММАСЫ

I көн, якшәмбе, 19 июнь, 2011 ел

10.30-11.00 Торжественное открытие KAZANHALAL 2011 күргәзмәсен ачу тантанасы

11.00-19.00 Күргәзмә-ярминкә

11.00-16.00 Хәләл Индустрия Форумы

17.00-18.30 Ял итү һәм күңел ачу программасы

II көн, дүшәмбе, 20 июнь, 2011 ел

10.00-18.30 Күргәзмә-ярминкә

14.30-17.30 Мастер-класслар

18.00-19.00 Тантаналы фуршет

III көн, сишәмбе, 21 июнь, 2011 ел

10.00-15.00 Күргәзмә эше

15.00 Күргәзмәне ябу