|
|
Бүген кемнәр туган
|
|
Архив
|
06.05.2011 Дин
Җомга көн ял булырга тиешТатарстан мөселманнарының чираттан тыш V корылтаена һәм республика җитәкчелегенә Саба районы делегациясе җомга көнен ял итүне үтенеп мөрәҗәгать юллаган иде. Матбугат битләрендәге фикер алышуларда кайберәүләр көндезге ялга бер сәгать өстәү белән генә чикләнергә тәкъдим итте. Эткә сөяк атып котылу ысулына охшаган бу. Даһи Тукаебыз әйтмешли, инде хуш, батты кояш, дигәндәй, бу изге көн тагын шул көндәлек ыгы-зыгы, бакчага барасы балаларны елатып уяту, аларны өстерәп, мәтәлә-кадала эшкә чыгып чабу белән башланып китәчәк икән. Җомга иртәсендә бәйрәм тәгаме пешерергә дип куясы камырны, ягып җибәрәсе җомга госеле мунчасын яһүди яисә насарани ял көннәренә авыштырырга туры килә мөселман кешесенә.
Инде җомга көннең калган өлешен күзаллап бетерик. Җомга вәгазен тыңлап, намазын укып, көндезге сәгать ике тулып өченчегә киткәндә эшенә кайткан хезмәткәр анда тагын өч сәгать утыра. Бу сәгатьләр республика икътисадына күпме файда яки зыян китерә ала? Җомганы ял көне итү-итмәү турында фикерләр басылган "Татар-информ" мәгълүмат агентлыгы атналыгында журналист ханым Венера Беляева да әйткән бит: "Җомга рәсми булмаган кыска көн санала: төшке аштан соң кешене эш урынында тотам димә инде (безгә, журналистларга, бу бик яхшы мәгълүм)". Бәс, шулай икән, нигә соң өч сәгатькә калгач вакланырга? Инде җомганы тулаем ял көне итү мөмкинлеге юк икән, ул чагында сәгать 12гә кадәр эшләп, көннең калган яртысын ял итеп рәсмиләштерү гаделлеккә якынрак булыр иде. Ватандашларыбыз арасында эшкә баруны сылтау итеп, иң мөһим һәм зур фарызны – җомга гыйбадәтен калдыру киң таралган. Халкыбызның диннән ерак булуы, Аллаһ Тәгаләдән курыкмавы аркасында барлыкка килгән югалтулар күпкә зуррак бит, хөрмәтле җитәкче һәм депутат иптәшләр! Сездән мәсьәләнең гадел чишелешен көтәбез.
Илдар ЯХЪЯ, Саба җәмигъ мәчете имам-хатыйбы |
Иң күп укылган
|