Кем ул Ленин?

Кичә Ленинның туган көнен билгеләп үтүчеләр дә булды. Пролетариат юлбашчысы Владимир Ульяновның тууына 141 ел булды. Берәүләр аны әле дә үзләренең лидеры итеп кабул итә, икенчеләр бөек сәясәтче буларак бәяли, өченчеләр исә Россиянең дошманы дип саный. Ә сезнең өчен кем ул Ленин?

Ранил ХӘЙБУЛЛИН, Казан шәһәренең 19 нчы төзәтү колониясе хезмәткәре:

– Кызыклы, күпкырлы шә­хес. Аның укырга өндәве кү­ңелгә аеруча сеңеп калган. Әй, мәктәптә аптыраталар иде шул сүзләр белән. XIX гасырда туып, XXI гасырда да телдә булуы Ленинның ника­дәр даһи икәнлеген тагын бер кат дәлилли. “Россия исеме” проектында Сталин белән беррәттән нәкъ Ленин­ның җиңеп чыгуы үзе генә дә ни тора.

Нәбирә ГЫЙМАТДИНОВА, язучы:

– Үткәнебездә булган бер генә нәрсәне дә сызып ташлый алмыйбыз. Ленинга карата да шуны ук әйтеп була: тарихыбызда аның үз урыны бар. Әйе, аның ялгышлары, хаталары күп булган. Тик хезмәтләре хакында да онытмаска кирәк. Безнең җәмгыять бик кызык: алга барырга, яңа үрләр яуларга омтылабыз, артыбыздан бар күперләрне яндырып барабыз. Ләкин кайвакытта кире әйләнеп кайтырга, артка карарга да ки­рәк. Ленинны пот биек­легенә күтәрү турында сүз бармый анысы. Күңелебездә булмаса да, тарих ки­тапларында, дә­реслекләрдә аның турында мәгълү­мат биреп барырга кирәк.

Хафиз МИРГАЛИМОВ, ТР Дәүләт Советында Коммунистлар фракциясе җитәкчесе:

– Ул – безнең тарихи байлыгыбыз, халык ихтыяҗын, мәнфәгатьләрен яклаган, якты киләчәк төзеп күрсәткән бердәнбер шәхес. Үзенең 55 томлык китапларында, 75 еллык совет чорында дөрес яшәү маягы булган ул. Ленин һәм аның көрәштәшләре турында ни генә язсалар да, аларга каршы көрәш алып барсалар да, халык өчен кабул ителгән программалар, законнар белән мактана алыр­лык башка мондый сәя­сәтче, җитәкчеләребез юк. Бү­генге тормышка карагыз инде: мәктәп, балалар бакчасы, хастаханә, фатир – бөтен җир­дә акча таләп итәләр, бар хезмәтләр түләүле. Шунлыктан совет халкы элекке вакытларны бик сагынып искә ала. Ни генә дисәләр дә, Ленин – бик зур галим, көрәшче, һәм иртәме-соңмы аның идеялә­ре җиңеп чыгачак.

Эльвира ШӘФИГУЛЛИНА, 1 нче татар гимназиясенең башлангыч сыйныф укытучысы:

– Җиңелрәк сорау бирсә­гез иде! Ленин, Ленин... Бөек кеше, тарихыбызда тирән эз калдырган атаклы шәхес. Тагын ни дип әйтергә дә белмим инде. Укучылар белән Тукай кичәсенә әзерләнеп йөри идек, Ленин кем ул, дип бө­тенләй аптырашта калдырдыгыз әле сез мине.

Юрий ПРОХОРОВ, Мәгариф һәм фән хезмәткәрләре профсоюзының ТР комитеты рәисе:

– Ленин – дөнья пролетариаты юлбашчысы. Безнең бар аңлы тормышыбыз марк­сизм-ленинизм тәгълиматын өйрәнүгә корылган иде, төрле чаралар ярдәмендә аны тормышка ашырырга омтылдык. Үз вакытында мин партия әгъзасы булдым. Ленин алга сөргән гаделлек идея­сеннән әле дә баш тартмадым. Шунлыктан аның турында уңай фикерләр генә әйтә алам.

Айрат СИТДЫЙКОВ, “Казан Кремле” дәүләт музей-тыюлыгы директоры урынбасары:

– Ленин турында кыска гына, тик бик эчтәлекле сүзләр әйтергә мөмкин: күренекле илбашчы, сәясәтче. Аның тарихыбызда нинди эз калдырганы хакында бәхәсләшү­не урынсыз дип саныйм. Даһи кеше булган ул.