Ләйлә Дәүләтова берьюлы 5 егеткә “Юк, юк...” дип җавап бирмәкче

17 апрель якшәмбе көнне «Пирамида» концертлар залында зур тамаша буласы. Ләйлә Дәүләтованың “Юк, юк...” дип аталган китапны тәкъдим итү бәйрәме. Якын тирә авылларда, Казан читендә яшәүчеләр дә күрә алсын өчен тамашаны кич тә, көндез дә куярга булганнар. Шулай итеп, бәйрәм 13.00 һәм 18.00 сәгатьләрдә башланачак.

Тамашада Ләйләнең өр-яңа җырлары һәм шигырьләре яңгыраячак. Аларны төрле буынның иң асыл ир-егетләре башкарыр дип көтелә. Фидан Гафаров, Фирзәр Мортазин, Айдар Галимов һәм... беренче тапкыр Казан сәхнәсендә - Раниль Нуриев! Шулай ук Башкортстанның бик талантлы композиторы Салават Низаметдинов бәйрәмне бизәячәк. Ә бердәнбер хатын-кыз Хәмдүнә Тимергалиеваны ник чакырдың дигәч, “Шушы ир-егетләрне кулда тотарга” дип җавап бирде шагыйрә.

Ләйләнең концертларына хас булганча, җырчылар без күрергә күнекмәгән төрледән-төрле образларда чыгачак. Айдар белән Фидан инде хәзердән үк борчылып шалтыраталар ди. Бу юлы безне нишләтәсең, янәсе. “Зинһар, өченче куплетта очып китәргә генә куша күрмә”, - дип әйткән ди берсе.

“Юк, юк...” җырын Салават башкаруында бик яратканга күрә, ник Салават юк дип аптыраучылар да күп икән. Бу сорауга җавапны концертка килгәч кенә белеп булачак. Күрәселәр бар әле.