|
|
Бүген кемнәр туган
|
|
Архив
|
24.03.2011 Җәмгыять
Казанның иң затлы туташы - Ширин Әл-Әнси !Г.Камал исемендәге Татар дәүләт академия театры бинасында шәһәр күләмендә үткәрелә торган “Татар кызы – 2011” бәйгесенең финалы булып узды. Башкалабызның җиде районыннан җиде чибәр туташ үзләренең уңганлыкларын, булганлыкларын һәм чын татарлыкларын мәшһүр театр сәхнәдән торып, бөтен шәһәргә раслады. Зур сәхнәгә чыкканчы кызларга шактый көч куярга туры килде. Иң беренче алар үз мәктәпләрендә сынау узды, ә инде аннары район мәктәпләре арасында да иң лаеклылар исеменә эләгү өчен тырышты. Кызларга биергә, җырларга гына түгел, ә чын хуҗабикә булачакларын да исбатларга туры килде. Быелгы бәйге Г.Тукайның 125 еллыгына багышланган иде. Шуңа күрә әзерләгән ризыклары да Тукай, яз белән нисбәтле булды (бәйгенең бу өлеше сәхнә түренә эленгән экран аша күрсәтелде).Кызлар гади генә яшелчәләрдән әзерләнгән ризыклары хакында бәян итте, Тукай әкиятләренә «сәяхәт кылдырды». Кызларны бу конкурста күрсәткән фантазияләренә танылган аш-су остасы Резидә ханым Хөсәенова хәттә үзе көнләште булса кирәк.
«Татар кызы-2011» конкурсының финалына чыккан кызларны котларга танылган җырчы Рөстәм Асаев та килде. Мондый дәрәҗәле артист егет белән бер сәхнәдә чыгыш ясарга туры килгән кызларыбыз һич кенә дә сынатырга теләмәде. Киров районының 4 гимназия-интертатында укучы Ландыш Нәсыйховага ярышта сәхнәдә беренче булып чыгыш ясады. Иҗатташ дуслары белән әзерләгән таныштыру мизгелләре тамашачыда уңай тәэсирләр калдырды.
Сәхнәдә миллилекне фәкать киемнәрдә генә күрергә туры килсә дә, конкурсантлар арасында Ширин Әл-Әнси аерылып торды, дип авыз тутырып әйтергә мөмкин. Аның үзенә Зәйтүнә образы (Г.Тукайның сөйгән яры) сайлавы сокландырды. Мәскәү районының Ш.Мәрҗани исемендәге 2 гимназиядә укучы Алинә Нәбиуллина да татар кызларына гына хас булган тыйнаклыгы белән үзенә җәлеп итте. Ә Идел буе районы кызы - Земфира Касыймова биергә генә түгел, поэма сөйләргә дә оста икәнен күрдек.
Шулай итеп «Татар кызы-2011» исеменә Ширин Әл-Әнси (Вахитов районы), «Уңган кыз» - Алинә Набиуллина (Мәскәү районы), «Зыялы кыз» - Ландыш Насыйхова (Киров районы), «Сылу кыз» - Земфира Касыймова (Идел буе районы), «Зирәк кыз - Алсу Сөләйманова (Яңа Савин районы), «Ягымлы кыз»-Гүзәл Галиева (Совет районы), «Сойкемле кыз» - Адилә Фәтхуллина (Авиатөзелеш районы) лаек дип табылды. Вакыт ягыннан шактый озакка сузылган чара җиңүчеләрне тантаналы рәвештә котлаулар белән тәмамланды. Киләчәктә уздырыла торган «Татар кызы» бәйгесендә милли киемнәргә киенгән туташларны гына түгел, ә чын мәгънәсендә тарихын белгән, милли геройлары белән горурланган чын татар кызларын күрәсе иде!
Мөршидә КЫЯМОВА |
Иң күп укылган
|