Татар сериалында баш рольләрне кем башкарыр?

“Татарстан – Яңа Гасыр” телевидениесе үзебездә төшерелә торган татар сериаллары белән куандыруны дәвам итә. Бу юлы яңа сериал Зифа Кадыйрованың “Сагынырсың – мин булмам” повесте буенча төшереләчәк. Шул уңайдан анда төп рольләрне уйнау өчен актерларга кастинг игълан ителгән иде. Гадәттәгечә ул берничә турда узды.

Беренчесенә үзләрендә актерлык осталыклары бар дип уйлаган 17 яшьтән алып 20 яшькәчә кызлардан һәм 20 яшьтән алып 25 яшькә кадәрге егетләрдән фотолар кабул ителде. Хатлар Казаннан гына түгел, ә төрле районнардан һәм хәтта Мәскәү өлкәсе, Удмуртия, Башкортстан, Ырынбур кебек төбәкләрдән дә килгән иде. Нәтиҗәдә электрон адреска 800гә якын хат килде. Алар арасыннан 100 кеше икенче турга сайлап алынды. Төп рольдә уйнаячак кыз матур, тигез тешле, зәңгәр күзле, кечкенә генә буйлы буласы...

Таләпчән жюри (Нурания Җамали, Хәлил Мәхмүтов, Наил Шәйхетдинов, Миләүшә Айтуганова, Венера Шакирова, Зөлфия Вәлиева) егет-кызларның алдан бирелгән өзекне ничек итеп уйнауларын карады. Берничә егет белән кыз жюрины шактый уйланырга мәҗбүр итте. Кайберләренә елмаерга гына түгел, хәтта кычкырып көлергә дә, берәр шигырь сөйләргә яисә җыр җырларга да туры килде. Шулай итеп өченче турга 10 кеше сайлап алынды.

Ничек кенә булмасын, жюри әгъзаларын яшьләрнең татар киносында төшергә омтылуы куандырды. Әлбәттә, арада талантлы егет һәм кызлар да юк түгел. Ләкин кайберләрендә диалект өстенлек итә, яисә татар теле чамалы. Бормалы сюжет сызыгыннан торган әлеге әсәрдә төп геройларны уйнаучылар әлегә төгәл билгеле түгел.

Соңгы тур март анда булачак.