Язмыш кисәтүләрен дөрес аңларга кирәк

Язмыш кисәтүләрен дөрес аңлаучы һәм рәхәт яшәүче кешеләр бар. Киресенчә дә булгалый. Мәсәлән, М.Булковның "Мастер һәм Маргарита" романында "Аннушка май түгәчәк, комсомолка башын кисәчәк" дигән кисәтү булса да, Берлиоз аңа ышанмый. Шөкер, бездә андый ук фаҗига булмады. Шулай да, мондагы суыкларга өйрәнмәгән Алматы кешесе өчен... Телефоннан шылтратып, Татарстанның халык артисты Фердинанд Сәлахов 19 февральдә 17 сәгатьтә булачак концертына чакырды. Мин бик куандым.

Дөньяда бердәнбер татар электрон газетасы "Интертат" үз битләрендә филармониядә үтүче Фердинанд Сәлахов кебек үк билгеле булмаган җырчыларның да тамашаларының афишаларын биреп бара, тик бу концерт турында бернинди игълан булмады. Мин моны күрсәм дә, әллә ни шигем тумады.

Концертка яшәреп барыйм диеп алдагы көнне, суык һавага да карамастан чәчтарашка киттек, анда: "Гафу итегез, бүген эшләмибез", - дигән язу эленеп тора иде. Бу гаҗәпләндерсә дә, әһәмият бирмәдем.

Шушы язмышның "юлыгыз уңмас" дигән җитди кисәтүләренә карамастан, 25 градус суыкта концертка киттек, керү урынында безне чакыру кәгазе көтә бит!

Килдек. Филармониянең утлары ялт-йолт килүче фойесы, билетлары һәм чакырулары булган бәхетлеләр туннарын гардеробка тапшыра, ләкин билет тикшерүче ханым бәхәскә урын калдырмыйча: "Сезгә чакыру юк, бәлки хезмәткәрләр керү урынында бардыр", - диде. Ләкин ул ишектә тагын да катгыйрак "Юк" сүзе генә ала алдык.

Ниһаять, бездә язмыш кисәтүләрен дөрес аңладык та, өйгә Михаил Булгаковны укырга кайтып киттек.