Балыкка... билет алып

Җәен дә, кышын да су буенда балык тотудан ләззәт алып, ял итүчеләр теләгән җирләрендә кармак салу бәхетеннән коры калды. Татрыбхоз балык тоткан өчен рөхсәт кәгазе алуны, гади генә итеп әйткәндә, билет сатуны гамәлгә кертте.

Бушлай балык тоту бәхете Бөек Ватан сугышы ветераннарына һәм пенсионерларга гына елмая. Бүтәннәр дә бушлай тота алачак, ләкин бер шарт белән: алар яр буеннан 50 метрдан да эчкәрәк керер­гә тиеш түгел. Димәк, көй­мә белән елга-күлләрнең эченә кереп, балык тотасың килә икән, башта акча тү­лисең. Өч көн дәвамында бер урында балык тоту бәясе — 220 сум (ә бер генә көн тотарга уйласаң?) Ярты ел буена теләгән саен килеп балык тоту хокукы бирә торган билет та сатып алырга мөмкин. Анысы 1200 сум тора һәм елганың «түренә» ук кереп балык каптыру хокукы бирә. Бер еллык билет — 2 мең сум.

Теләгән вакытта җайлы гына төянеп кармак салырга чыгып китәргә ияләшкән балыкчы халкы моннан соң башта билет сатып алу ягын кайгыртырга тиеш була. Аны кайдан барып ала­сы? Татрыбхозның һә­вәскәр балыкчылар бүлеге җитәкчесе Дамир Фәйзуллин әйтүенчә, хәзер рес­публикада балык тоту белән шөгыльләнү хокукы­на Татрыбхоз гына түгел, бүтән оешмалар да ия икән. Әгәр Боровое Матюшино, Тәмте, Зөя, Яшел. Үзән якларына юл тотарга уйласаң, билет сатып алу өчен Татрыбхозга мөрәҗә­гать итәсе. Казаннан ерак китми генә Идел буенда балык тотып хозурланам дисәң, «СМИТ» җәмгыятенә барырга туры ки­ләчәк. Кыскасы, барганчы, башта кәгазь юнәтәсе. Хәзер табигый байлыклар, урман-күлләр халыкныкы түгелмени? Д.Фәйзуллин, моңа җавап итеп: «Без махсус заводларда балык үрчетеп елгаларга җибәрәбез, – диде. – Әлбәттә, балыкчылардан җыелган акча завод салырга җитми. Ә менә Рыбнадзор, экология милициясе белән берлектә атнасына ике тапкыр рейдлар оештыруны финансларга ярап куячак. Ягулык, техника алырга да кирәк бит...»