Фурсенко Татарстанның дүрт вузын КФУга берләштерде

РФ Мәгариф һәм фән министрлыгының Татарстанның өч вузын Казан (Идел буе) федераль университетына кушу белән бәйле үзгәртүләр турындагы боерыгы дөнья күрде.

Министр Андрей Фурсенко имзалаган Россия Федерациясе Мәгариф һәм фән министрлыгы боерыгы нигезендә Казан (Идел буе) федераль университетына Татар дәүләт гуманитар-педагогика университетын, Казан дәүләт финанс-икътисад институтын һәм Алабуга дәүләт педагогика университетын кушу белән бәйле үзгәртүләр турындагы карар кабул ителде.

Боерык беркем өчен дә көтелмәгән булмады. Ул бары тик бер ел элек федераль Хөкүмәт дәрәҗәсендә кабул ителгән карарны гына рәсми рәвештә раслады. 2009 елның октябрендә Россия Президенты Дмитрий Медведев “Төньяк-Көнбатыш, Урал һәм Ерак Көнчыгыш федераль округларында федераль университетлар булдыру турындагы” боерыкны имзалаган иде. Узган елның 29 июнендә Казан (Идел буе) федераль университетының галимнәр берлеге бер тавыштан КФУга Татарстанның өч вузы – ТДГПУ, КДФИИ һәм АДПУ кушуны яклап тавыш бирде.

Указда федераль функияләрне һәм вәкаләтләрне Россия Мәгариф һәм фән министры башкара диелгән. Оешмаларга беркетелгән милек, тулысынча федераль университетка беркетелә.

Шулай ук Алабуга дәүләт педагогика университеты базасында “Алабуга шәһәрендә Казан (Идел буе) федераль университеты филиалы”н ачу йөкләнгән.

КФУ ректоры Илшат Гафуровка 1 мартка кадәр Россия Мәгариф һәм фән министрлыгына федераль университет уставын расларга тапшыру йөкләнгән. Шулай ук берләштерелә торган вузларда укучы студентларның теләкләре буенча федераль университетта укыту формасы һәм шартларын саклап укуларын дәвам иттерү зарур диеп ассызыклана.