Укытучы елын яктыртуга багышланган конкурс Гран-прие “Татар-информ” агентлыгы генераль директоры Л.Толчинскийга тапшырылды

Шулай ук агентлыкның район һәм шәһәр газеталарына “Атна вакыйгалары” кушымтасы Татарстан Республикасында “Укытучы елын яхшы яктырту” номинациясендә икенче урын алды

“Татар-информ” агентлыгы Татарстан Республикасында Укытучы елын яктыртуга багышланган республика журналистлары конкурсында Гран-прига лаек булды. Аның Укытучы елына кагылышлы мәгълүматны даими һәм оператив рәвештә биреп баруы игътибарга алынган. Бүген “Пирамида” күңел ачу үзәгендә Укытучы елын тантаналы рәвештә ябу тантанасында ТР Дәүләт Советы Рәисе урынбасары, ТР Журналистлар берлеге рәисе Римма Ратникова бу бүләкне агентлык генераль директоры Леонид Толчинскийга тапшырды.

Шулай ук агентлыкның район һәм шәһәр газеталарына “Атна вакыйгалары” кушымтасы Татарстан Республикасында "Укытучы елын яхшы яктырту” номинациясендә икенче урын алды.

Римма Ратникова, педагогларны бүгенге бәйрәм белән котлап: “Минем коллегаларым бераз гына мактанчык. Алар “әгәр жруналистлар теге яки бу чараны яктыртмаса, ул булмаган кебек тә”, диләр. Әмма беркем дә Укытучы елы булмады дип әйтә алмый. Чөнки ел дәвамында телевидение, радио буенча тапшырулар, репортажлар, вакытлы матбугатта язмалар чыгып килде. Бөтен ил, бөтен республика безнең Президентыбыз күзәтчелегендә ТР Мәгариф һәм фән министрлыгы, муниципалитетлар тырышлыгы, иң мөһиме – сезнең хезмәтегез белән никадәр эш башкарылганын күрде”, - диди вице-спикер.

Конкурсны ТР Мәгариф һәм фән министрлыгы, ТР Журналистлар берлеге, Республика матбугат һәм массакүләм коммуникацияләр агентлыгы оештырган иде.

Әлеге конкурста илледән артык район һәм республика дәрәҗәсендәге массакүләм мәгълүмат чаралары катнашкан. Жюри вакытлы матбугатта басылган һәм эфирга чыккан меңгә якын эшне бәяләгән.

Аерым алганда, җиңүчеләр “Телевидениедәге иң яхшы сюжет” (“Татарстан” ДТРКның “Вести-Татарстан” мәгълүмати программасы алып баручысы Венера Мөхәммәтова), “Иң яхшы телепрограмма” (“Татарстан – яңа гасыр” каналының “Мәктәп” программасы), “Иң яхшы материаллар сериясе” (“Казан” ТРКсы), “Иң яхшы язма” (Мамадыш районының “Нократ” – “Вятка” басмасы мөхәррир урынбасары Светлана Ханова) , “Иң яхшы радиопрограмма/радиотапшыру” (“Татарстан” радиосы иҗат коллективы), “Татарстан Республикасында Укытучы елын яхшы яктырту” (“Татарстан – яңа гасыр” теле-радиоканалы) номинацияләрендә билгеләнде.