12.11.2010 Бәйрәм

"Генераль репетиция"дән репортаж һәм фотолар

“Яңа гасыр” телеканалы “Йолдызлы сәхнәдә генераль репетиция” исемле Яңа ел тамашасы төшерде. Ул алты сәгать барачак – 31 декабрьнең кичке сәгать уныннан 1 гыйварның 4нә кадәр.

“Яңа елны ничек үткәрәсәң, елың шулай уза” дигән гыйбарә белән яхшы таныш без. Шуңа да әлеге бәйрәмне “җәелеп” үткәрергә яратабыз. Бәйрәм өстәленә (ул мулрак булган саен, елың уңышлырак була, имеш), яңа киемгә (моның төсе, фасонына кадәр билгелиләр; мәсәлән, әтәч елында кызыл киемнән булу зарур иде), иң мөһим элемент – чыршыга, чыршы уенчыкларына һ.б. акчасын җәлләп тору юк. Елның иң төп бәйрәме бит, “ышту син”...

Бөтенесен: кызыл күлмәк, чыршыны рәткә китереп, өстәл янына килеп утыргач та телевизордан кайсы каналны карарга белми җәфа чигәсең. Начар тамаша карасаң ел буе кәефең булмый дигән ышану да бардыр әле, шуңа яхшысын сайлыйк. Гадәттә, “НТВ”, “Беренче”, “Россия” каналларыннан ничава гына концерт бара. Ләкин ул ел да бертөрле, “чәйнәлгән” һәм Мария, Иваннар телендә.

Быел, ниһаять,“ТНВ” безгә альтернатива тәкъдим итә. Сәгать унике тулганчы сәгать ярым “Йолдыз буласым килә” исемле мюзикл күрсәтеләчәк. Аның төп геройлары Гөлчәчәк белән Рөстәм (Г. Камал театры артисты Гөлчәчәк Гайфетдинова һәм “Мунча ташы” артисты Рөстәм Хәсәнов) бер-берсенә гашыйк. Икесенең дә йолдыз буласы, таныласы килә. Сюжет буенча алар бер-берсеннән качып, кастингта катнаша һәм телевидениега килеп эләгә.

Мюзиклда күп кенә җырчылар, танылган артистлар да уйнаган. Алар үзләренә яңа булган рольләргә кергән, ди. “Минем һәрвакыт берәр усал хатынны, каенананы, үги ананы уйныйсым килә иде. Ләкин миңа мюзиклда ферма мөдире роле эләкте. Минемчә, татар телевидениесында әлегә мондый иҗади кичәнең булганы юк иде”, – диде Венера апа Ганеева. “Ә мин колхоз председателе булдым, – дип горурланды Җәвит Шакиров, – ә хәләл җефетем укытучы”. Чыннан да, һәрбер җырчының яңа эше барлыкка килгән: Бәширә Насыйрова - җыештыручы, Зәмирә Гәрәева белән Лилия Муллагалиева – кибетчеләр, Гөлүсә Исмәгыйлева белән Алия Исрафилова – сыер савучы, Данил Гыйниятов- район башлыгы...

“Мюзикл төшерү идеясы каян барлыкка килде соң? Үзебезнең пәрдә, кадр артындагы тормышны күрсәтәсе килде. Программалар төшергәндә күп кенә кызыклы вакыйгалар була, шуңа ирония да җитәрлек мюзиклда. Аннары, тамашачылар да моның белән кызыксына”, – диде “Яңа гасыр” каналының генераль директор урынбасары Миләүшә Айтуганова.

Әлдермеш авылы, Казан һәм “Яңа гасыр” каналының үз студиясендә төшерелгән бу маҗаралар курантлар 12не сукканда тәмамлана. Президент сүзләреннән соң Яңа ел тамашасы концерт белән дәвам итә. Аны Гамил Әсхәдулла һәм мюзиклның геройлары -Гөлчәчәк белән Рөстәм алып бара. Салават, Зәйнәп Фәрхетдинова, Айдар Галимов, Хәния Фәрхи, Зөфәр Билалов, ИлСаф, Нәфкать Нигъмәтуллин, Венера Ганеева, Рәсим Низамов, Резидә Шарафиева, Зөфәрр Хәйретдинов, Вил Усманов, Зөһрә Шәрифуллина, Гүзәл Уразова, «Казан егетләре» төркеме, Алсу Абелханова, Илназ Минвәлиев, Нурзадә һ.б. чыгыш ясаячак. Миләүшә Айтуганова әйтүенә караганда, җәмгысе 60лап номер булачак. Бу концертны кайбер җитез казанлылар 8нче, 9нчы ноябрьләрдә “Пирамида” күңел ачу үзәгендә карарга өлгерде инде: билет алып бу кичәне күзәтергә мөмкин иде.

Мин карап өлгергән өлешендә игътибарга лаеклы байтак чыгыш булды. Хәния Фәрхи ике җыр башкарды. Ул үзенең чыгышы турында: “ Ике җырым да дуэт. Берсендә кызым Алия Гәрәева белән чыгыш ясыйм. Бәләкәйрәк чагында гына минем белән сәхнәгә чыккан кызым, ниһаять, моны янә кабатлады. Ул хәзер бик җитди эштә эшли”. Җыр вакытында сәхнәгә Хәния ханымның оныгы Әминә, кече кызы Алсу да менде. Алар башкарганда җырга кушылып: “Нык бул, балам, яшәргә тырыш”, дип сузып җибәрәселәр килеп китте.

Илсөя Бәдретдинова балалар бакчасында ел да башкарыла торган “Чыршы, чыршы, без сине, сагынып көттек ел буе” җырының үзгәртелгән вариантын тәкъдим итте. Номер бик заманча, күңелле килеп чыккан.

Ничек инде Яңа ел президентсыз, Кыш бабайсыз, диярсез сез. Алар да булды. Ләкин Татарстан президенты дип белдергәч никтер элеккеге “президент” чыкты. Минтимер Шәриповичның иң кызык фразаларын алып яхшы гына пародия килеп чыккан. Аның монологыннан өзекне сезгә дә тәкъдим итәм: “ Киттем, китүем булды – Казанка кипте, – дип рифмага салып башлады ул, – бәрәңге дә булмады мин киткәч. Әнә күрше Башкорстанда да шул хәл. Мортазаның китүе булды – бал булмады...Мин киткәч тә яхшы җитәкчеләр килде – алар да булдыра...”. Ялган Шәриповичне тыңлаганда янымда утыручы апаның шыркылдавына урындыклар селкенеп торды, хәтта.

Кыш бабай һәм Кар кызы сәхнәдә күренеп кенә алдылар. Кызык кына килеп чыккан: Рөстәм белән Гөлчәчәк мюзиклда да уйный, концертны да алып бара, Кыш бабай белән Кар кызы да – алар.

Гөлнара Габидуллина “Балам” җырын башкарып, елыйсыларны китерде. Бик эчкерсез җыр. Нурзадәнең номерлары тулылыгы белән аерылып тора. Кып-кызыл, кыска күлмәге, сикереп биюләре генә ни тора!

Аңлашыла ки, бу – концертның бер бәләкәй генә өлеше. Башка елларны урыс телеканаллары концертына “Оливье” салаты капкалап утырсам, быел, мөгаен, “ТНВ” карармын. Тулысынча карарга кирәк бит инде концертны. Аннары Яңа елда туган телебездә кәнсирт карау савап та булыр.

Р.S. Бәйрәм төнендә телевизор каршына ак яки сары төсләрдәге кием киеп утырырга киңәш итәм. Быелгы Яңа елда нәкъ шундый төс уңыш китерә, ди.