|
|
Бүген кемнәр туган
|
|
Архив
|
24.10.2010 Җәмгыять
Журналистлар йортын сатканнарТатарстан Республикасының Журналистлар берлеген (ЖБ) ун ел дәвамында файдаланган бинасыннан чыгаралар. Шуңа бәйле рәвештә әлеге оешманың президиумы белдерү таратты. Әлеге оешма Казанның Тельман ур., 24 й. адресы буенча урнашкан Журналистлар йортында 2000 елдан бирле үк үз эшчәнлеген алып бара. Анда иҗади семинарлар һәм очрашулар, “түгәрәк өстәлләр”, матбугат конференцияләре һәм башка чаралар еш уздырыла. “Без республика җитәкчелегенә, башка иҗади берлекләр кебек үк, Берлегебез эшчәнлеге өчен дә тиешле шартлар тудырылуына рәхмәтлебез. Казан шәһәре җитәкчелегенә дә ун ел дәвамында тапшырылган мәйданнарны түләүсез файдалану буенча муниципалитет преференциясенә ия булганыбыз өчен рәхмәтле”, – диелә бу белдерүдә. Быел исә ЖБ мондый өстенлектән, шулай ук бинаны арендалау турында килешү төзү мөмкинлегеннән дә мәхрүм калды, ә Журналистлар йорты физик затка сатып җибәрелгән. “Бу эш Берлек җитәкчелегенә белдермичә башкарылды, аның сәбәпләре аңлатылмады, алмашка нинди бина тапшырырга мөмкин икәнлеге турында фикер алышу булмады. Безнең гариза буенча Казан прокуратурасы тарафыннан тикшерү үткәрелде. Шуның барышында ачыкланганча, Журналистлар берлеге йортын сатканда, дәүләт һәм муниципаль милекне хосусыйлаштыру турындагы законнар, “Мәдәният мирасы (тарих һәм мәдәният ядкарьләре) объектлары турында” Федераль законның, РФ Граждан кодексы нигезләмәсе бозылды. Прокуратура шулай ук биредә РФ Җинаять Кодексының 201, 243, 285, 293 нче маддәләрендә күрсәтелгән җинаять эшләренең билгеләре булу мөмкинлеге турында да мәгълүмат җиткерде”, – диелгән бу белдерүдә. “Журналистлар берлеге президиумы шәһәр хакимиятенең бу гамәлен Журналистлар берлеген һәм ул алып барган эшне бөтенләй хөрмәт итмәү дип бәяли, – дип язылган анда. – Җәмәгатьчелек игътибарын шушы вакыйгага юнәлтеп, Татарстан журналистлары исеменнән, закон бозулар төзәтелер, ТР ЖБнең Журналистлар йортына хокуклары торгызылыр, ә Казан муниципаль хакимиятенең журналистлар белән мөнәсәбәтләре элеккегечә конструктив эчтәлек белән тулыр, дигән өмет белдерәбез”, – диелә Татарстан Журналистлар берлеге президиумының Журналистлар йортына бәйле рәвештә килеп чыккан гадәттән тыш хәл уңаеннан ясалган белдерүендә. Анда шулай ук “Иҗади берлек – ТР Журналистлар берлеге” иҗтимагый берләшмәсендә 1060 әгъза исәптә торуы әйтелә. Алар арасында республикада һәм Россиядә билгеле каләм әһелләре, РФ һәм ТР атказанган мәдәният хезмәткәрләре, бу һөнәр ветераннары һәм журналистика юлыннан яңа гына китүчеләр дә бар.
--- |
Иң күп укылган
|