ТЕЛЕФОННЫ “АГУЛЫЙЛАР”

Казан түрәләре дивар, коймалардагы “ял” тәкъдим итүче телефон номерларына каршы көрәш юлын тапкан. Моннан ары әлеге номерларга бертуктаусыз шалтыратып торачаклар. Моның өчен башкалада заманча җиһазландырылган “call-үзәк” ачылган. Махсус компьютер төн дәвамында һәр номерга 9 меңгә кадәр “сәлам” җибәрергә мөмкин.

Казан башкарма комитеты каршында сафка бастырылган үзәкнең эш тәртибе бик гади. Бөтен “законсыз” номерлар махсус компьютер программасына кертелә. Автомат җайланма әнә шул телефон номерларына бертуктаусыз шалтыратып торачак. Ул тәүлек дәвамында эшли. Телефон номе­ры хуҗаларына бер үк сүзне кабатлыйлар: “Исәнмесез, сезнең игълан гамәлдәге законнарны бозып урнаштырылган. Аларны алып атуыгызны үтенәбез, юкса, сезгә каршы административ чаралар күреләчәк”. Төн дәвамында гына компьютер һәр телефонга 9 мең тапкыр шалтыратырга мөмкин.

Үзәк эшли башлауның беренче ике атнасында 62 телефон номерын өздергәннәр инде, тагын 53 номер буенча хуҗаларның түземлеген сыныйлар. Хуҗалар дигәннән, баксаң, “ял” тәкъдим итүче но­мерларның күбесе әби-бабайларга теркәлгән икән. Абонент линиясеннән файдаланган өчен пенсионерларга көненә 100 сум чамасы акча түлиләр. Хәзер “эшмәкәр” әби-бабайларга җавап тотарга туры килмәгәе. Үзәкне җиһазландыру өчен шәһәр хакимияте бер миллион сумнан артык акча тоткан. Түрәләр әйтүенчә, әлеге чыгым үз-үзен каплаячак. “Ял” телефоннарыннан соң, чиратта – фатир сату-алу белән шөгыльләнүчеләр, курс, диплом эше язучылар. Ә дивар, коймалардагы телефон номерларын тизрәк җыю өчен “кайнар линия” булдырмакчылар.