Ринат Рахматуллин: "Мине башка яхшы эшкә чакырдылар. Һаман уйлыйм, сәхнәдән китәргәме, юкмы"

25 ел сәхнәдә бит мин! Мактанып әйтмим, гади бер авыл баласы, 1990 еллардагы авыр чорны, төрле сынауларны узып, үз юлымны таптым. Хәзер мине бөтен Россия буйлап диярлек милләттәшләр белә. Кая барсам да, таныйлар.

 

— Ел башыннан тыгыз режимда эшләдек. Берничә өлкәдә булдык. Әле төркемгә бер атна ял бирдем. Җырчылар да, концертлар да күп. Мәдәният йортына киләсең, афиша өстенә афиша ябыштырылган. Тамашачы кемгә генә йөреп бетерсен?! Аларны да аңлап була. Шуңа кайда ничек инде: кайбер якларда шыгрым тулы заллар каршы ала, икенчеләрендә яртысы да тулмаска мөмкин...

 

— Гастрольдән Буага кайткач, шәһәрдә озак тормыйм, авылга әнкәй йортына китәм. Анда миңа рәхәт. Өйне ташламадык, җәй буе гаилә белән шунда тордык. Кош-корт тоттык, бакча карадык. Газны, утны кышын да аермыйбыз. Әнкәй вафат булганнан бирле йорт бер көн дә караучысыз тормады. Мин булмаганда, абый килә. Бөтен уен кораллары, аппаратурам шунда... Авылда тыныч. Әнкәй генә юк. Ул бөтен стрессларымны бетерә, өшкерә, аның белән аралашып, бушана идем. Хәзер дә анда кайткач, янымда йөридер кебек. Өйне ташламавыма куанып бетә алмыйм. Әнинең догалары, рәхмәтләре даими булыша. Ул: “Йортны ташламагыз”, — дип васыять әйтеп калдырды. Абый да, мин дә аның сүзен үтибез. (Алар гаиләдә өч бала була: Рөстәм, Алсу һәм Ринат. Кызганыч, Алсу апа да вафат инде... — Л.Й.) Өйне беркайчан ташламаячакбыз...

 

— Юбилей үткәрү турында уйлана башладым, зурлап бәйрәм итәргә ният бар. 50 яшь бит ул, ярты гасыр!

(Тулырак "Ирек мәйданы" газетасының 30 гыйнвар саныннан укый аласыз.)