«Солянка» ны күзләп: Кыска кара итәк кигән Лейнага халык дәррәү килеп кул чапты

Айлин исемле яшь җырчының туфлиләре, мәсәлән, 25 мең тора икән. Күлмәгенең бәясен сорарга курыктым. Шул арада гримеркаларны бутап ялгыш Зөфәр абый Хәйретдинов килеп керде, елмаеп исәнләште дә, гафу үтенеп чыгып китте. Шунда Фирүзә исемле җырчы безгә Зөфәр абый белән икесенә бер җыр булуы турында сөйләп алды. Сүзләрен берсе, көен икенчесе язган- авторлык хокуклары икесендә дә бар. Алай ярый иде мени?

 

Вакыты җитү белән Хитлар солянкасы башланып та китте. Концертны Лейна үзенең хит-җырлары белэн башлап җибәрде. “Миләшләрем” һәм, барыбыз да белгән, “Малай на белом барсе”. Халык дәррәү килеп кул чапты. Ә ник чапмаска? Кыска кара итәктән Лейна, артында бөгелеп-сыгылып биюче ике чибәр кыз. Әфәрин!

 

Лейнадан соң эстафетаны, Мәскәүгә китәм дип игълан иткән Айгөл Рәхимова алды. Баксаң, җырчы ике фронтка эшләргә җыена икән. Аннары Миндияр Шәймарданов, Алинә Даутова, Рамиль Әйметдинов тамашачыга таныш җырлары белән сәхнәдә сүз тотты.

 

Сценарий авторы Айсылу Лерон, концертны “Хәерле иртә, Австралия” стилендә язган. Алып баручылар белән тамашачы нәкъ эфирдагы кебек аралашып, сөйләшеп утырды. Алып баручыларның һәр шаяруын көтеп алып, халык рәхәтләнеп көлде. Әйткән һәрбер сүзне игътибар белән тыңлады. Узып баручы елның төп өч хиты итеп, сүз осталары Азат Фазлыевның “Сиңа”, Рөстәм Закировның “Җанымда яз булып кал әле” һәм Радиф исемле яшь автор-башкаручының “Кемнәр керде арага” җырын атады. 

 

Радиф исә үзе, бу җырны хит җырга санамый. Барысы да тамашачы, халык кулында дип аларны якынлашып килүче Яңа ел бәйрәмнәре белән котлады. Яңа ел дигәннән шуны да әйтергә кирәк, җырчылар әлеге бәйрәмгә  100 процент әзер. Тиздән бит әле Яңа ел солянкалары да башланачак! Менә, мәсәлән 16,17 декабрь Филармониядә әкияти «Кышкы Солянка», 26 декабрь Уникста «Яңа ел солянкасы -ЗУР КАРНАВАЛ» узачак.

 

Берничә вакытка арабыздан югалып торган Илназ Сафиуллин да әлеге бәйрәмгә үз өлешен кертте. Әти булу килешкән, яшәреп, матураеп киткән ул. Алга таба да иҗат итәргә, Барсмедиа оештырган концертларда чыгыш ясарга әзерләнә ул.

 

Иң соңыннан сәхнәне Фазлыевлар дер селкетте, халык кушылып җырлады, басып бииде, инстаграмга фото һәм видеоларын элде. Музыкаль олимпнын иң югары ноктасында торучы җырлы гаиләгә бары тик уңышлар гына теләп каласы килә.

 

Салкын, яңгырлы көз кичен, яраткан җырлар белән үткәрергә килгән тамашачы концерт тәмамлангач та урыныннан торып китәргә ашыкмады. Бәйрәм башында алып баручылар интригалар да, яхшы кәеф тә, хит җырлар да булачак дип сүз биргән иде-шулай булып чыкты да. Концерт үзебезчә, күңелле һәм зәвыклы булды. Мондый очрашулар еш булсын! Яшәсен татар җыры.

Фото: клиптан скриншот