«Россия 1» каналының «О самом главном» тапшыруында төшкән Норлат авылы әбиләре ниләр майтарып ята?

Яшел Үзән районының Норлат авылы әбиләрен хәзер Татарстанда гына түгел, Россиядә дә беләләр. Сәламәт яшәү рәвеше алып барган пенсионерларны быел Мәскәүгә, «Россия 1» каналында бара торган «О самом главном» тапшыруына да чакырганнар иде.

Пенсионерлар җәй көне Санкт-Петербургка сәяхәт иттеләр. Күптән түгел Казандагы күңел ачу үзәкләренең берсендә боулинг уйнап кайттылар. Үзләрен «Яшь йөрәкләр» дип йөртәләр. Чынлап та, йөрәкләре яшь әле аларның, яшәү дәртләре ташып тора.

Бер генә дә тик торганнары юк үзләренең, пенсиягә чыккач та тормыш туктап калмаган алар өчен. «Яшь йөрәкләр» төркеменең үзләренең хорлары бар, еш кына репетицияләргә җыелалар, һәр җомга спорт залында фитнес белән шөгыльләнәләр, бассейнда йөзәргә, скандинавия таяклары белән йөрергә, концерт, театрларга барыр­га, сәяхәт итәргә дә вакыт табалар. Моннан тыш, яраткан әни, дәү әни дә әле алар.

Норлатта «Яшь йөрәкләр» төркеме оешканга биш ел тирәсе. Шушы вакыт эчендә Президенттан 500 мең сумлык грант та отты алар. Бу акчага 15 велосипед, чаңгылар, скандинавия таяклары, флешкалар, музыка уйнатыр өчен колонка, скакалка, боҗралар, башка кирәк-яраклар алганнар, хор өчен сәхнә күлмәкләре тектергәннәр. Хәзер төрле бәйгеләрдә катнашалар. Авылда узган бәйрәмнәрдә алар – кадерле кунак.

Төркемнең җитәкчесе Ләлә Хаҗипова – авылының киләчәге өчен борчылып шәһәрне ташлап, авылга кайткан бизнесмен хатын. «Авыл дигәч, кайбер кешеләрнең күз алдына иске йортлар, тездән пычрак килеп баса. Әмма безнең авылда яшәр өчен бар мөмкинлекләр дә тудырылган. Хәтта шөгыльләнер өчен спорт залларына кадәр бар. Диван белән телевизор – кешенең төп дошманы. Гел хәрәкәттә булу кирәк. Әбиләрнең күбесе аралашыр, серләрен уртаклашыр өчен дә бергә җыела, пенсиягә чыккан кешеләрне берләштерүче төркемнәр һәр районда булсын иде», – ди Ләлә апа.