МАТУРЛЫКНЫ, ЯХШЫЛЫКНЫ - ҮЗ КУЛЛАРЫБЫЗ БЕЛӘН ЭШЛИК!

Казаныбызда кызыклы гына бер проект тормышка ашырыла. Ул Citycelebrity дип атала. Беренче карашка гына ят яңгырый бу сүз, чынлыкта һәрберебезгә якын шөгыльләр белән бәйләнешле. Citycelebrity — яшьләрнең иҗади сәләтен үстерүгә юнәлтелгән федераль иҗтимагый проект. Кул эше, кием дизайны, фотога төшерү, нәфис сәнгать, бию, косметология, хатын-кызның сәламәтлеге кебек өлкәләрдә үзеңне күрсәтергә мөмкин. Әлеге проект Казан шәһәрендә 4 апрельдән старт алды. Чарада һәркем, бер тиен дә түләмичә катнаша ала. Өч ай буена Citycelebrity остаханәсендә мастер-класслар үткәрелә.

Кайда һәм кайсы көннәрне оештырылуы, нинди кунаклар чакырылуы турында проектның махсус сайтында укып белергә була - www.citycelebrity.ru.Сәләте белән шаккатырганнар башка шәһәрләрдә дә, ил күләмендә дә таныла алачак.
   
8 июньдә 15.00 сәгатьтә “Гаврош” балалар приютында (Казан шәһәре, К.Тинчурин урамы, 3 йорт) шушы Citycelebrity остаханәсе тарафыннан мәрхәмәтлелек акциясе оештырылачак. Балаларны яклау көне уңаеннан, 1 июньдә матбугат конференциясе булган иде. Анда “Шоколадтан балалар өе төзе” проектын игълан иттеләр. Шоколад һәм йомшак уенчык алып килгән һәрбер кеше, бу сәнгать әсәрен ясауда үз өлешен кертә ала. Сишәмбе көнне шушы татлы өйне “Гаврош”ка бүләк итәчәкләр. Шулай ук приютта тәрбияләнүчеләр өчен дизайн, рәсем ясау мастер-класслары булачак. Кутюрье Ирина Штыкина балалар өчен киемнәр коллекциясен тәкъдим итәргә җыена.

1

2

3

4

5