"Йөрәк икегә бүленде. Бер баламны кочаклап алам да икенчесен уйлыйм"

Әниләре Айгөл авырга узуга ук, табибларга йөри башлый. Беркем дә кушмый, үзе шулай тели. Янәсе, бар да әйбәт булсын! УЗИда карынында ике сабый ятканын әйткәч, җаваплылык тагын да арта.

 

– Тапшырмаган анализым калмады. Космонавт булырга җыенаммыни?! Бер җирем дә авыртып борчымады, йөклелекне җиңел күтәрдем. Әмма табиблар миңа декрет ялына башкалар кебек 30 атнадан түгел, алданрак китәргә кушты. Әллә белгәннәр инде? – дип сөйли Айгөл. – 33 атна дигәндә тулгагым башланды. Тизрәк җыенып, бала табу йортына киттем. Табуым да тиз булды.

 

Малайларны әниләренә күрсәтәләр. Ул чакта исемнәрен белмәсә дә, кайсы алдан туганын, кайсы соңрак икәнен хәтеренә кертеп куя. Табиб икесенең дә 2 кило 800 грамм икәнлекләрен җиткерә. Айгөл сабыйларын күкрәгенә ала. Тик шатлык тулы мизгелләр озакка сузылмый. Балаларны караган табиб, сулыш алуларында кимчелек күреп, нарасыйларны реанимация бүлегенә күчерә.

 

– Улларымны анда озак тотмаслар, дип өметләндем. Һәр кич, иртән бәлки сабыйларны минем янга күчерерләр, дип көттем. Тик булмады. Хәтта яннарына да кертмәделәр. Балаларның хәлләре яхшырмады, хәтта үзләре сулый да алмаган. Шуннан соң аларны башка хастаханәгә күчерделәр, – дип искә ала Айгөл. – Башта Сабирны өйгә чыгардылар. Йөрәк икегә бүленде. Бер баламны кочаклап алам да икенчесен уйлыйм. Игезәк сабыйлар әнисе булуы җиңел түгел икән. Берсен алып кайткач, икенчесен дә чыгарсалар ярар иде, дип тели башладым. Бер төнне гел дога укып, теләп яттым. Иртәнге унда исә безгә Самирны чыгаруларын әйттеләр.  Төн эчендә сабыйның үзе сулый башлавы могҗизага тиң иде.

 

Сабыйлар өйгә кайтса да, мәшәкатьләр кимеми. Әниләре аларның үсешендә кимчелекләр күреп ала, әмма җитлекмичә тугач шулай буладыр дип, күңелен тынычландыра. Сабыйларны төрле белгечләр тикшерә. Озак та үтми, ДЦП диагнозы куялар. Әле аның янәшәсендә тагын бер кочак чирләр өстәлә. Үпкәләренең дөрес эшләмәве, күзләренең начар күрүе… Саный китсәң, бармак җитми. Әмма Садыйковлар авыруга бирешергә җыенмый. Әлегә сабыйлар үзләре тотып ашый да белми.

 

– Табиблар өметне өзми. Тиешле дәвалану алсак, малайлар савыгырга да мөмкин. Үзләре шук та, тик менә ничек тә аякка бастырасы иде. Бик тә йөреп китүләрен  көтәм. Сабир махсус аяк киемнәре кидергәч, бераз тотынып атлый. Шушы көннәрдә ике яшьне тутырдык. Күңелдә гел изге теләк – сәламәт булсыннар! – ди  Айгөл. – Безне Кытай табиблары көтә. Анда дәвалану кыйммәт. Ике балага тернәкләндерү курслары үтәр өчен 792 мең сум акча кирәк. Шуңа да мәрхәмәтле кешеләрдән ярдәм сорыйм.

 

Айгөл Рәзиф кызы Садыйкова исемендәге

 

Саклык Банкы картасы: 2202200734237413

Мобиль банк: 89997418949 (мегафон)