|
|
Бүген кемнәр туган
|
|
Архив
|
01.06.2008 Җәмгыять
ТУГАН КӨН ШУЛАЙ ҮТТЕМай — бәйрәмнәргә бай ай гына түгел, кызу эш чоры да. Хезмәтләре белән халык күңеленә үтеп кергән шәхесләрне дә биргән әле ул. 1е — журналист, Татарстан Дәүләт Советы рәисе урынбасары Римма Ратникова, язучы Вакыйф Нуруллин, 6сы — шагыйрь Ренат Харис, 9ы —җырчы ИлСаф, 11е — Рөстәм Закиров, 14е — тарихчы Рафаэль Мостафин, 21е — режиссер Фәрит Бикчәнтәев, 22се — Дәүләт Советы рәисе Фәрит Мөхәммәтшин, 23е — композитор Фасил әхмәт, 24е — сәясәтче Индус Таһиров, җырчы Хәмдүнә Тимергалиева, 27се — Зөлфия Шакирова, 29ы Гөлнара Тимерҗанова туган.
Ренат ХАРИС: — Мин туган көнемне ике тапкыр бәйрәм итәм: 29 апрельдә һәм 6 майда. Соңгысы паспорт буенча. Беренче көнне якыннарым, икенче көнне дуслар белән билгелим. Бүләккә килгәндә, аны күбрәк бирергә яратам. Кешедән алганда уңайсызланам. Гомер бәйрәмем көнне хатыным Лилия иртән базарга чыгып, мин яраткан ак яки сары төстәге чәчәк алып кайта. Шуннан да зур бүләк юк. Аннан соң һәр туган көнемдә истәлеккә шигырь язам.
Фәрит БИКЧӘНТӘЕВ: — Мин тыйнак кеше, шау-гөр килеп туган көн уздырырга ярат- мыйм. Бу көнне хатыным Люция гадәти табын кора. Мин яраткан “Керпе” кәтлитен пешерә. әлбәттә, торт алабыз. Котларга килүчеләр гел була анысы. Иң истә калган туган көн дип, 25 яшемне атыйм. Ул вакытта армия сафларында, Калининград өлкәсендә идем. Май ахыры булуга карамастан, ишеп-ишеп кар яуды. Быел хатыным белән улым җәйге кием-салым бирделәр. Мин юк кына әйберне дә зур бүләк төсле кабул итәм. Бала-чага кебек чын күңелдән сөенәм.
Зөлфия ШАКИРОВА: — Быел туган көнемне үткәрмәдем. Төнлә юлга чыгасы булгач (Башкортостанга кайтабыз), көне буе эш белән мәшгуль идем. Паспортта мине 5 июньдә туган дип язганнар, котлап өйгә килүчеләр булачак әле. Әмма мин гомер бәйрәмемне билгеләргә яратмыйм, ул көнне күңелемә бик моңсу була. Ә менә Җәвитем белән улларымның туган көненә бик теләп әзерләнәм. Туган көнемдә таңнан торып иң беренче Җәвитем тәбрик итте, чәчәк бирде. Аннан улларым котлады. Ирем миңа алтын әйберләре бүләк итүне хуп күрә. Бу юлы бриллианттан ясалган комплект тапшырды. Мин көндезге сәгать дүрттә туганмын. Нәкъ шул вакытта әнием шалтыратты. 81 яшьтә булуына карамастан, хәтере яхшы. Минем өчен иң зур бүләк — сәламәтлек. ә иң истәлекле әйбер — күмер самавыры. Аны берничә ел элек әнием бирде. әле дә кадерләп саклыйм. Мунча кереп чыккач, шикәр белән күмер самавырыннан чәй эчәргә яратам.
Гөлнара ТИМЕРҖАНОВА: — Туган көнне үткәрергә яратмасам да, сәнгать кешесе, дус-ишләр күп булгач, бәйрәм итәргә туры килә. Быел табигатькә чыктык. Уха пешердек, кунакларны бәлеш белән сыйладым һәм, мәрхүм әтием өйрәткәнчә, карлыган яфрагы, сөт салып, учакта чәй кайнаттым. Кайберәүләр ялгышып 26 майда тәбрик итте. Үземә бүләк ясарга уйладым. “Тойота ярис” машинасы сатып алдым. Ә иң истәлекле бүләк 29 яшемдә булды. Ирем Илдар 29 гөлчәчәк биргән иде.
ИЛСАФ: — Мин Җиңү көнендә дөньяга килгәнмен. Мәктәптә укыганда бу көнне ветераннар алдында чыгыш ясый идем. Хәзер дә еш кына концерт вакытына туры килә. Быел исә гаилә дусларыбыз белән Казандагы бер ресторанга бардык. Нинди генә ризыклардан авыз итсәк тә, хатыным Миләүшә әзерләгән кебек тәмле “Тун” салаты юк иде. Ул аны биек итеп ясый. Кечкенә чакта әти-әнием туган көнемә Кубан гармуны бүләк иткән иде.
Эльмира СӘЛАХОВА |
Иң күп укылган
|