|
|
Бүген кемнәр туган
|
|
Архив
|
04.09.2019 Шоу-бизнес
Рафинә Ганиуллинаның туган көне: "Үз-үземне кат-кат тикшереп утырдым"4 сентябрьдә татар эстрадасы җырчысы Рафинә Ганиуллинаның гомер бәйрәме. "Туган көнең белəн кадерле, сөекле хатыным! Таза-саулыктан Ходай аермасын, ике бөркет кебек улыбызны тигезлектә, исән-сау үстерергә язсын! Иҗади зурдан зур уңышларга ирешеп торырга язсын. Халык мәхәббәтен арттырырга, яңа җырлар, яңа проектлар белән сөендерергә язсын. Шулай кулга кул тормыш дилбегәсен тотып, бары тик алга атларга!" дип котлый аны сөекле тормыш иптәше, баянчы Рәзил Камалов. Инде үзе дә ике бала анасы булган, курчак кебек кечкенә генә бу кызны дүрт сеңелнең апасы димәссең дә. Киресенчә, тышкы кыяфәте белән ул иркә, төпчек кызны хәтерләтә, дип яза Безнең гәҗит.
- Рафинә, исемең бик үзенчәлекле. Нәрсә аңлата?
– Үземнең дә күп эзләгәнем булды аның мәгънәсен. Китаплардан тапмадым. Рәзинә, Рәдинә дигән исемнең бер варианты дип кенә язылган. Интернетта эзләнә торгач, Грециядә Рафина дигән шәһәрне таптым. Бәлки, шуннан килеп чыккандыр. Минем белән авырлы вакытта, әнием Нәбирә Гыйматдинованың «Су» дигән повестен укыган булган. Шунда баш героиняның исеме дә Рафинә була. Миңа да әни Рафинә дип кушкан.
– Сез гаиләдә биш кыз. Әниегезнең: «Ник берегез булса да малай булмады икән?», – дигәне булмадымы?
– Юк. Киресенчә, әни безнең барыбыз да кыз булганга сөенеп туя алмый. Ә шуның кадәр күп булуыбызның сәбәбе – әтинең малай теләвендә (көлә).
– Син гаиләдә өлкән бала. Сеңелләрегез белән бер-берегезгә охшаганмы, әллә инде һәркайсыгыз төрле-төрлеме?
– Безне белгән-күргән кешеләр: «Сез бишегез дә бер төрле инде», – диләр. Тик без аерылабыз. Аллага шөкер, бишебез дә Казанда яшибез һәм бик еш күрешеп-очрашып торабыз. Характерларыбыз, тормышка карашларыбыз, тышкы кыяфәтләребез бишебезнең биш төрле булса да, без бик тату.
– Син үзеңне нинди бала дип саныйсың?
– Өлкән булгач, миңа җаваплырак булырга туры килә. Әни дә мине төпле дип уйлыйдыр, дип ышанасы килә. Ул һәрвакыт минем белән киңәшләшә, минем фикергә таянып эшли. Төпчек балалар һәр гаиләдә дә иркә буладыр инде. Бездә дә кечкенә кызыбыз, башкаларга караганда, иркәрәк. Ә менә мин үземне иркә кыз дип әйтмәс идем.
– Һәр сәнгать кешесе, гади кешеләрдән нинди дә булса сәер ягы белән аерылып тора. Синең сәер гадәтләрең бармы?
– (Көлә.) Дөресен генә әйткәндә, мин бу хакта бик күп уйланганым булды. «Минем бу гадәтем башкаларга сәер тоеладыр инде», –дип үз-үземне кат-кат өйрәнеп, тикшереп утырдым. Ни гаҗәп, бер генә дә сәер ягымны да тапмадым (көлә).
Рафинә Ганиуллина һәм аның сеңелләре, әнисе Зөлфия ханым Мансурның тормыш юлы турында тулырак "Матбугат.ру"да укып белергә мөмкин.
--- |
Иң күп укылган
|