19.08.2019 Матбугат

Казан телевидение студиясенә 60 ел. Флюра Абдуллина: "Татар халкына хезмәт иттек"

16 августта Казан телевидение студиясенең алтмыш еллыгы уңаеннан оештырылган тантаналы бәйрәм чарасы үтте. Студия ветераннары һәм хезмәткәрләрен юбилей уңаеннан Татарстан Президенты Аппараты Җитәкчесе Әсгать Сәфәров котлады. Үз чыгышында студиянең дистә еллар дәвамында туган телдә сөйләүче бердәнбер телеканал булып торуын искәртте ул. Телевидение ветераны Флюра Абдуллина бәйрәм уңаеннан "Матбугат.ру" белән истәлекләрен уртаклашты:

"Мин телевидениядә 27 ел эшләдем. Телевидениянең ишеген ачып кергән вакытларда, Казан урамнарында татарча сөйләшә алмаган чорлар иде. Күз алдыгызга китерегез, ул вакытларда телевидениядә бөтен кеше татарча гына сөйләшә, матур әдәби телдә, бәйрәмчә киенгәннәр, аларның үз-үзләрен тотышына хәйран калырлык иде.

Шул вакытта мин күңелемнән “менә кайда икән ул татар дәүләте, миңа биредә эшләргә кирәк” дидем. Ул вакытта телевидениянең рәисе Илгиз Хәйруллин, рәис урынбасары Тәүфыйк Сагыйтов, баш режиссер Әхтәм Зарипов иде. Мин ул чорларны “Великолепный век”, дип әйттәм. Безнең өчен генә түгел, ә татар дөньясы өчен мөһим чор булган. Чөнки, ул чорда телевидение, аның хезмәткәрләре татар теле сагында тордылар.

Без яшь буын вәкилләре шул рухта тәрбияләндек. Соңыннан без белгеч булып формалаштык. Остазларыбыз сызган юлдан тайпылмыйча атладык. Һәрберебез үз программаларын булдырып, матди кыйммәтләргә игътибар итмичә, татар халкына хезмәт итте. Шуның белән үзебезне бәхетле санадык", ди Флюра Абдуллина.

---
Матбугат.ру
№ --- | 19.08.2019