"Исән калу мөмкин булмаган..." - Лаештагы фаҗиганең нечкәлекләре билгеле булды

Видеодан күренгәнчә, машина зур тизлек белән хәрәкәт иткән. Авариядән соң автомобильдән бары тимер өеме генә калган. Мондый коточкыч юл һәлакәтендә исән калу мөмкин дә булмагандыр, мөгаен. Социаль челтәрләрдә халык авария сәбәпләрен үзенчә фаразлый. Хатынны гаепләүчеләр дә җитәрлек. Шул ук вакытта, бәлки ул баласын карарга, дип, игътибарын читкә юнәлткән булгандыр, дип аны акларга да тырышалар. Татарстанның Эчке эшләр министр­лыгыннан алынган ­мәгълүматлар буенча, «Тойота» машинасын йөртүче хатын куркынычсыз тизлек сай­ламаган. Ул каршы як кюветка очып чыккан. Машина әйләнеп капланган. Юл һәлакәте автоюлының 34нче километрында булган бу хәл. Нәтиҗәдә, машина йөртүче кыз урында ук җан биргән, ул саклану каешын эләктермәгән булган. Бала махсус автолюлькада булса да, ул да урындыкка беркетелмәгән, күрәсең, һәлакәт вакытында салоннан «очып» чыккан.

 

«Татар-информ» мәгълүмат агентлыгы хәбәр иткәнчә, һәлак булган кыз Казаннан, Резедә исемле. Аңа нибары 25 яшь. Резедәның үлемен туганнары да, дуслары да бик авыр кичерә. Ул ире белән шәһәр читеннән йорт алган булган, бу көнне дә шул өеннән Казанга кайтып килүе булган, күрәсең. «Үрнәк гаилә иде алар. Ире акыллы, ике балалары үсеп килә иде. Олы кызлары беренче сыйныфны тәмамлады. Резедә бик позитив, ачык күңелле, яхшы кеше иде», – дип искә алган аны дус­ты «Татар-информ»да. Дус кызы Резедәне автомобильләр фанаты булганын да әйткән.