Илдар Ганиев - икенче буын фермеры

Илдарны икенче буын фермеры, дип атарга да була. Иске Ярмәкнең “Коминтерн” колхозы таркалгач, беренчеләрдән булып авылда шәхси хуҗалык оештырып җибәргән кеше аның әтисе Кәрәм Ганиев булды. Өч улы үсеп җитеп, үз тормышлары белән яши башлагач, ата кеше тормыш дилбегәсен алар кулына тапшыра. Ләкин ерак та китми: кайда кирәк, акыллы киңәше белән дә, эше белән дә ярдәмгә ашыга. Тәҗрибәсе байтак бит аның!

 

Бәхет елмайган

 

Илдар крестьян тормышына кечкенәдән өйрәнгән кеше. Хезмәт сөючән Кәрәм һәм Сәрия Ганиевлар өч улларын да шулай тәрбияләп үстерделәр. Илдар эшен умарта кортлары үрчетүдән башлаган иде һәм, умартачылыкның бөтен нечкәлекләренә дә төшенеп, күңел биреп эшләп китте. Әтисе бүлеп биргән техникасы, җир кишәрлеге дә бар аның. Ә хөкүмәнт гранты алу өчен документлар тутырып җибәргәч, башта ышанмады - алга ыргылыш ясарлык акча килеп төшкән бит! Димәк, җир эшкәртү өчен трактор һәм агрегатлар, сыер көтүен арттыру өчен нәселле үгезләр сатып алырга мөмкин булачак. Болар барысы да аның бизнес-планында язылган иде. Ә конкурс үткәч, аңа 1 миллион 468 мең сум акча да бирелде.

 

...Менә ике ел инде Ганиевлар хөкүмәт акчасына сатып алынган тракторда сөреп чәчәләр, иген кырлары елдан-ел зурая бара. Быел алар 1000 гектар җирне эшкәртеп ашлык чәчкәннәр.

 

- Малларны, умарта кортларын карау, җир эшкәртү кебек эшләр белән җәйге озын көннең узганын сизми дә каласың, - дип йортын күрсәтеп йөри Илдар. - Менә Беларусь 892,2 тракторым, менә КМ БД-2,4-2п дип аталган дискаторым. Алар ярдәмендә җир эшкәртү берни дә түгел.

 

Ә терлек абзары төзелүгә инде берничә ел булыр. Анда үгезләр күшәп тора. Мал асрау – җиңел эш түгел, зоотехника, ветеринария өлкәсендә белемең булмаса, эшең барып чыкмаячак. Ярый әле Иске Ярмәктә ветеринария участогы бар. Ә шулай да хуҗаның үзенә дә малларны дәвалау ысулларын өйрәнергә туры килә.

 

- Хуҗалыгың зур булганда тын алырга да вакыт юк. Әти, бертуганнарым Илшат һәм Илнар белән бергә язгы культуралар чәчеп бетерергә өлгермәдек, инде печән вакыты да җиткән, җиңел сулап куям дигәндә инде игеннәр өлгергән булыр... Шунысы яхшы - хәзер без беркемгә дә бәйле түгел, техника үзебезнеке, кайчан кирәк, кайчан уңай, шул вакытта кырга чыгабыз. Әйе, хөкүмәт биргән ярдәм бик вакытлы булды шул, - дип шатлыклары белән уртаклашалар Илдар белән Лия. Ә элек аларга трактор сорап күршеләргә керергә туры килә иде.

 

Иртә торалар, соң яталар

 

Илдар белән Лиянең көне иртәнге биштә үк башлана. Әйе, шулай, фермер булсаң, ялны да, бәйрәмнәре дә оныт инде, көн саен бер эш – сыерларны саварга, малларны карарга, умарталарны аерырга, кырларны сөреп-чәчәргә, икмәкләрне җыеп алырга, өй эшләрен дә онытмаска... Бөтен эштә дә Лия Илдарның беренче ярдәмчесе. Бертуган энеләре һәм әтисен сөйләргә дә юк инде. Бу гаиләдә бөтен эшләрне дә бергә эшлиләр, килеп чыккан проблемаларны уртага салып хәл итәләр. Шуңа да уртак эш алҗытмый, киресенчә, дәрт өстәп, яңа үрләр яулауга өнди. Менә үткән елда Кинель-Черкасста уздырылган “Авыл хуҗасы” өлкә акциясендә Илдар “Мужчина-фермер” дипломы белән бүләкләнгән иде. Бу да очраклы хәл түгел, Илдар ирләрчә, җигелеп эшли белә, кызы белән улын да шулай тәрбияли. Алла кушса, Эльнара белән Эдуард Иске Ярмәкнең өченче буын фермерлары да булып китәрләр әл