|
|
Бүген кемнәр туган
|
|
Архив
|
17.06.2019 Ир белән хатын
"Кичерерләрме аны?" (ЯЗМЫШ)Фиркать белән югары классларда укыганда бик дуслашып киттек. Кая барсак та гел бергә йөрибез. Мәктәптән дә бергә кайтабыз. үзебезнең генә серләребез барлыкка килде. Мәктәпне тәмамлагач, кая укырга керәсебезне дә хәл итеп куйдык. Компьютерлар төзәтү белән шөгыльләнәсебез килә. Фиркатьнең әти-әнисе ураза тота, биш намазын калдырмый торган кешеләр. Дини бәйрәмнәр вакытында, корбан чалу гаетендә мине дә үзләренә дәшәләр. Фәрит абый — Фиркатьнең әтисе мәкам белән догалар укыганда күзләрдән яшь килә. Бу гаиләдә бөтенесе чем кара чәчлеләр, янып торган кап-кара күзлеләр. Әниләре генә гел яулык бөркәнеп йөргәч, нинди икәнен төсмерләп булмый. Сыйныфыбызда сап-сары, матур көдрә чәчле Люда укый. Бүтән кызлар арасында чаялыгы белән нык аерылып тора ул. Зур зәңгәр күзләрен бер тутырып караса, аяк астындагы җир каядыр киткән кебек тоела. Менә шушы урыс кызы безнең белән йөрергә гадәтләнде. Мәктәптән кайтканда да безгә иярә. Сумкасын Фиркатькә бирә дә, чырык-чырык көлеп, янәшә атлый. Бу безнең икебезгә дә ошый. Аның чәчләреннән аңкыган сихри исне икебез дә сизәбез. әмма без бит мөселман малайлары. Люда кебек кызларга безгә гашыйк булырга ярамый. өйдә безгә гел шулай дип тукып торалар. Ләкин унҗиде яшьлек йөрәкнең моны аңлыйсы киләме соң? һәм без икебез дә шушы кызга гашыйк булдык. Люда моны, хатын-кыз буларак, сизде, аңлады. һәм Фиркатьне миннән өстенрәк күреп, аны сайлады. Хәзер инде мин мәктәптән үзем генә кайта башладым. җитәкләшеп йөргән Люда белән Фиркать янында артык булып йөрмәм бит инде. Алар хәзер гел бергә иделәр. Мәктәпне тәмамлаган елны ук өйләнешергә уйладылар алар. Фиркать ЗАГСта да, ресторанда узачак туй мәҗлесендә дә гел янында булуымны үтенде. Туйны Люданың берничә кибете булган әтисе үз өстенә алган, матди якны ул күтәргән. Бик ошаткан ул төпле Фиркатьне.
Туй көнендә ЗАГСта да, ресторанда да Фиркатьнең әти-әнисен, туганнарын мин күрмәдем. Алар улларының чит милләт кызына өйләнүен кабул итә алмаганнар. әмма Люданың киявенә әйткән сүзләре мине тетрәндерде: «Нәрсә борчыласың соң? Алар безгә хәзер чит кешеләр бит». Бүген генә никахын теркәгән хатын шундый сүзләр әйтергә тиешме? Минем бүтән кәләшне күрәсем килмәде. Сәбәбен дә аңлатмыйча, мин кайтып киттем.
Бер айдан Фиркать мине үзе эзләп тапты. Аерылышырга гариза бирүен хәбәр итте. Туйның икенче көнендә үк чиркәүгә барулары, никахлашу булганын сөйләде. Бу аны аяктан ега язган. Ләкин Людага, аның туганнарына каршы килә торган көч тапмаган. әти-әнисе кичерерме аны? Аларга нинди авырлык китергәнен әле генә аңлаган дустым.
Ул чыгып киткәннән соң, ярый әле Люда мине сайламады дип, Ходайга рәхмәт укыдым. Ә бит мин үлеп гашыйк идем классташ кызыма. Фиркать белән Люданың җитәкләшеп йөрүен мин бер фаҗига итеп кабул итә идем. әле дә яратам бугай мин ул зәңгәр күзле кызны. җавапсыз мәхәббәтем бит ул минем. әмма әниеңнең фатихасымы, әллә мәхәббәтеңме дип сорасалар, мин беренчесен сайлар идем.
Динарны тыңлады Алмазия ГАТИНА.
--- |
Иң күп укылган
|