|
|
Бүген кемнәр туган
|
|
Архив
|
08.01.2019 Җәмгыять
Елны ничек башладыгыз?Ял иткән арада яңа елның беренче атнасы тәмамланып та килә. Узганын шактый катлаулы булды дип искә алучылар да аз түгел. Кайберәүләр өчен ул, киресенчә, иң уңышлы елларның берсе булган. Ничек кенә булса да, Яңа елны яңа өмет, яңа шатлык белән каршыларга күнеккән безнең халык. Ә сез елны ничек башладыгыз? Илмас Хәмидуллин, Кайбыч районының мәгариф бүлеге җитәкчесе: – Елыбыз гадәттәгечә башланды. Башка көннәрдән бер аермасы да юк. Иң мөһиме – барыбыз да исән-сау, якын туганнарыбыз кунакка кайтты. Әмма бәйрәмнәрдә игътибар үзәгендә булган гаиләләр өчен борчылып тордык. Бүген аларның хәлләрен белеп чыгарга җыенабыз. Баш ял итсә дә, физик хезмәт белән ныгыйбыз. Авылда кар күп ява. Көрибез, түгәбез. Балалар һәм кайткан кунаклар белән чаңгыда, тимераякта шуабыз. Ялларны файдалы итеп уздырырга тырышабыз.
Динә Латыйпова, җырчы:
– Аллага шөкер, яңа ел матур гына башланып китте. Узган елны Кайбыч районында озаттык. Сәгать унике сукканы көтмәдек, юлга кузгалдык. Ульян өлкәсенә җиткәндә, яңа ел туды. Шампан шәраблары аттыру да юк, Аллаһы Тәгаләгә шөкер итеп, дога кылдым да, юлны дәвам иттек. Иртәгәсен Әләзәндә 300 кешелек туй иде. Бик рәхәт кенә итеп эшләп кайттык. Әмма өйдә торган юк әле. Без гыйнварның 10ысына кадәр мәҗлес-бәйрәмнәрдә эшлибез.
Эльмира Лотфуллина, Арча районы, Казанбаш авылы:
– Яңа елга иң якын кешеләрем белән кердем. Барлык туганнарымны үзебезгә чакырган идек. Якын иткәннәр кайтты. Рәхәтләнеп ял иттек. Өйдә хатын-кыз күп булгач, миңа бер эш тә эләкмәде. Мал карау, сыер савудан башка эш эшләмәдем. Клубка да чыгып кердек. Лотерея уйнаттык. Бер төргәк салам эләкте. Шунысына сөендем әле. Авылда үз кибетебез булгач, тик торып булмый. Кызым белән чиратлашып, сатабыз. Бәйрәм узып бара, тормыш дәвам итә. Кешегә шырпысы да, тозы да кирәк. Тиздән мәктәпне тәмамлаганга 25 ел була. Туган ягыма кайтасым бар. Әти-әнине, якыннарымны бик сагындым. Елны матур башлагач, шулай дәвам итәрмен дип уйлыйм. Бар да әйбәт буласына ышанам.
Фәүзия Шиһапова, Мамадыш районы, Түбән Яке авылы:
– Елның беренче көнендә 55 яшьлек юбилеем иде. Пенсия тирәсендә ыгы-зыгы башлангач, бу көнне бик дулкынланып көттем. Документларымны да алдан ук тапшырган идем. Янәсе, бер көн өчен ярты ел көттермәсләр, дидем. Тик законнан узмыш юк икән. Шулай итеп пенсиягә чыкмый калдым. Яңа елны балаларым, кода-кодагыйларым, туганнарым, дусларым белән бәйрәм иттек. Еллар югалтусыз, якыннар янәшәсендә узсын иде.
Гөлназ Яруллина, Казан:
– Ел башында иремнең туган көне. Кунаклар чакырабыз, бәйрәм ясыйбыз. Ирем – гаиләбезнең туендыручысы. Икенче балабыз авыру тугач, тормышны алып бару аның өстенә генә калды. Тормышыма шөкер итсәм дә, ел саен ниндидер могҗиза көтәм. Улым сөйләшмәсме, үзе утыра башламасмы дип өмет итәм. Олы улым сау-сәламәт булса да, икенчесе ДЦП диагнозы белән туды. Акылына зыян килмәгән, әмма хәрәкәтләнә алмый. Гаиләбез белән аның савыгуын көтәбез. 28 гыйнварда улыма ярдәм йөзеннән хәйрия концерты узачак. Шул эшләр белән дә мәш киләм. Бер күңелле вакыйгабыз бар – 2019 елда гаиләбез тулыланырга тора. Кыз бала көтәм. Исән-сау гына дөньяга китерергә язсын.
Зөфәр Хәйретдинов, композитор:
– Күп еллык традицияне бозмыйча, Яңа елны гаилә белән каршы алдык. Гади генә, тыныч кына итеп үтеп китте. Озын ялларны әрәм итмичә, сәламәтлекне ныгытырга булдык. Санаторийда дәваланабыз, бассейнда йөзәбез. Эшкә көч туплап чыгарга исәп.
Фәнис Мостафин, Арча районының Утар Аты авылы имамы:
– Елны матур итеп каршы алдык. Узган ел борчу-хәсрәтле булды. Көтмәгәндә якын дусларны югалттым. Хатынсыз калганнан бирле, гел балалар дип яшим. Кызым Башкортстанда кияүдә булгач, бересе үк алар янына киттек. 2се көнне туган көнем иде. Балаларым бәйрәм ясады. Әле дә кунакта мин. Еллар имин булсын, кайгы-хәсрәт килмәсен, югалтулар аз булып, кешеләр күбрәк игелек кылсын иде. Аллаһы Тәгаләдән имин көннәр сорыйк.
--- |
Иң күп укылган
|