“Хуҗабикә” Яңа елга әзерләнә

ХУҖАБИКƏнең оештыручысы һəм җитəкчесе – иң актив аккалфакчыларыбызның берсе, клуб мөдире Надирə Сəйфетдинова. Декабрь аенда узган чираттагы утырышлары бераз үзенчəлекле булды, анда алар Яңа ел табыны-на куелачак ризыкларын əзерлəп китереп, бер-берсенə тəкъдим иттелəр, рецептлар белəн уртаклаштылар. Бүген без сезгə дə, хөрмəтле хуҗабикəлəр, Яндавиш- ча алмайлары əзерли торган ризыкларны тəкъдим итəбез, бəлки, кайберлəре сезнең бəйрəм табы- нында да урын алыр.

 

“Хуҗабикə”нең иң өлкəн əгъзасы – Хасəнə апа ЛАТЫПОВА. Ул гомер буе колхозда эшлəгəн, дүрт бала үстергəннəр, биш оныгы, бер оныкчыгы да бар инде. Ике баласы гаилəлəре белəн башкалада яшилəр, берсе Рбишчада, төпчек улы əлегə əнисе янында. Бала-оныклары əнилəре пешергəн һəр ризыкны яратып ашый, ə инде иң яратканнары – бəрəңге бөккəне икəн. “Əни, берни кирəкми, шуны гына пешер безгə, дилəр балаларым, əллə нинди тəм-томнардан да өстен күрəлəр шул бəрəңге бөккəнен”, - ди Хасəнə апа. Аны ул гади пəрəмəч камырыннан эшли. Ə эчлеге – сөт, ак май белəн изгəн бəрəңге боламыгы (пюресы) һəм аңа карабодай лачаулары (гречневые хлопья) куша. Лачауларны алдан пешерергə кирəкми, кайнар бəрəңгегə салып болгагач, алар йомшара, аннары мичтə бөтенлəй пешəлəр. Бу бəрəңге бөккəне өйдəге каймак белəн бик тəмле була икəн. “Минекелəр əлдə аны кайнарлата сөт белəн ашарга яраталар”, - дип уртаклашты Хасəнə апа.

 

Наҗия ХƏСƏНОВА бəйрəм кичне гаилəсе өчен бүтəн ризыклар белəн беррəттəн мантый пешерə. Аны ничек итеп эшлəргə икəнне һəр хуҗабикə белə, шулай да һəрбересенең үз сере бардыр, Наҗия дə шул сере белəн уртаклашты. Ул мантының эчлегенə кинза, куркума кебек тəмлəткечлəр дə куша икəн һəм бераз үзенчəлекле, əмма бик тəмле килеп чыга. Өч баласы, дүрт оныгы өчен əнилəре пешергəн ри- зыктан да тəмлерəге юк инде. Шулай ук бар яктан да уңган Наҗия авыл халкына да мəҗлеслəргə камыр ашлары пешерүдə ярдəм итə, казлар йолку, өй юу кебек эшлəрдə дə аңа тиңнəр юк икəн.

 

Ирадə ХӨСƏЕНОВА “Хуҗабикə”нең иң актив əгъзаларының берсе. Ул җирле мəктəптə башлангыч классларны укыта, төп хезмəте күп көч талəп итүгə карамастан, җан шөгыленə вакыт таба һəм бер генə утырышны да калдырмый. Менə бу юлы да тыгыз мəктəп эшендə вакыт табып,

 

килеп китте клубка. Бу уңган ханымның барлык ашлары телеңне йотарлык була, Яңа ел табынына да ул ире һəм ике улы, ял көннəрендə килеп- китеп йөргəн күп санлы кунаклар, туган-тумача өчен күп тəм-томнар əзерли, ə инде барысы да яраткан “коронный” ризыгы – холодец. Аны ул күбрəк атныкын эшли һəм күбесе хуҗабикəлəр кебек сай савытларга салмый, тирəн савытта биек итеп эшли, формасы белəн тортны хəтерлəтə. “Кайчак сеңерле ит азрак булса, бераз желатин кушарга мөмкин”, - ди Ирадə.

 

Йолдыз НƏБИУЛЛИНА – дүрт бала əнисе, оныклары да берничə инде. Бу матур җырлаучы ханым аш-суга да, бигрəк тə камыр ашларына уңган. Табын күрке булган кош теле аларда Яңа ел табынын да бизи икəн. Аны ул ромб формасында кисеп, уртасында тишек ясый һəм бер читен шуннан уздыра, үзенчəлекле, матур формалы, чын-чынлап кош телен хəтерлəткəн ризык килеп чыга.

 

Аның кызы Рушания МУСИНА да əнисенə охшаган уңган-булган яшь ханым. Ул клубта хезмəт итə, өч баласы да булуга карамастан, барысына да өлгерə. Яңа ел табынына күптөрле ризыклар əзерлəсə дə, традицион «Оливье” салатына өстенлек бирəлəр. Əмма аңа ул озынча нəзек итеп туралган помидор да куша. Шулай эшлəп карасагыз, үкенмəссез, бер төрле үзенчəлекле тəме булган бу иске яңа салат якыннарыгызга да ошар дип белəм. “Без туарлар, кош-корт асрыйбыз һəм бөтенлəтə мичтə кыздырылган үрдəк шулай ук Яңа ел табынының традицион ризыгы”, - ди Рушания. Аның тагы бер яраткан шөгыле бар – ул кул эшлəренə бик оста, пластилиннан, бүтəн материаллардан матур-матур əйберлəр эшлəп чыгара, матур итеп рəсем дə ясый.

 

Гөлсинə УМЯРОВА җирле райпо кибетендə сатучы булып эшли. Эше шулай ук мəшəкатьле булса да, өлгер ханым гаилəсен, якыннарын кунак итəргə, сыйларга ярата. Ə Яңа ел кичне табын уртасында тутырылган каз була алар йортында. Эчлеккə Гөлсинə алма, пешерелгəн дөге ярмасы куллана, каз түшкəсенең эченə-тышына тəмлəткечлəр сөртə. Каз бит зур, аны мичтə аз дигəндə ике-өч сəгать пешерергə кирəк һəм өсте кипмəсен өчен ул аны махсус пакетка тыгып пешерə, алар хəзер һəр кибеттə диярлек сатыла.

 

Инде “Хуҗабикə”нең хуҗабикəсе Надирə СƏЙФЕТДИНОВАга да чират җитте. Надирə - безнең газетаның якын дусты, даими хəбəрчебез, иң актив аккалфакчыларыбызның берсе. Клубта ул бербуйлый нинди генəме чара уздырмый, барысы турында да диярлек яза килəбез. Ул шулай ук гаилə учагын саклаучы уңган хуҗабикə, тугры хатын, өч улына яратучан əни, оныкларына ягым- лы əбекəй. Надирə төрле салатлар əзерлəргə ярата, кайберлəрен үзе дə уйлап чыгара, я булмаса билгеле салатларга бүтəн ингредиентлар өсти. Шуларның берəрсен сезгə дə тəкъдим итəбез. Фасоль салатына бер банка фасоль, 1 татлы борыч (кызыл төстəгесе), 1 кап краб таякчыклары яисə ите, 150-200 г каты сортлы сыр кирəк. Борычны, таякчыкларны турарга, сырны эре тишекле кыргычта кырырга, тəменчə сарымсак салырга һəм барысын бергə майонез белəн болгатырга. Бик тəмле ананас салатын əзерлəр өчен 1 банка консервланган ананасны шакмаклап турарга, бераз сыр

 

кырырга, тəменчə сарымсак өстəргə һəм майонез белəн болгатырга кирəк. Күргəнегезчə, үтə гади, əмма бик тəмле салатлар килеп чыга.

 

Ə инде ул тəкъдим иткəн торт - бəйрəм алды ыгы-зыгысында чын-чынлап “палочка-выручалочка”. Барыгыз да кибеттəн балык формасындагы кечкенə коры печенье алганыгыз бардыр. 300 г шул печеньены вак шакмаклап туралган 4 банан, 1 стакан шикəр комы, 500 г 20 процентлы каймак белəн болгатырга, тирəн савытның эченə гади целлофан пакеты җəеп, савытның төбенə, ян якларына нəзек итеп телемлəп киселгəн киви тезəргə һəм əзер массаны салып, пакет белəн өстен капларга да, 7-8 сəгатькə суыткычка куярга. Аннары пакетны ачып, савытны өстенə тəлинкə куеп капларга һəм пакетны алырга. Искиткеч тəмле торт була. Киви телемнəрен чыршы формасында киссəгез, Яңа ел торты əзер!

 

Менə шундыйуңганхуҗабикəлəряшиЯндавишчада. Алар барча газета укучыларга Яңа ел телəклəрен җиткерүебезнедə үтенделəр. Бездə аларны, алар йөзендəбарча уңган-булган алмайларны, туташларны килəчəк Яңа 2019 ел белəн котлыйбыз! Тормышларыгыз тыныч, гаилəлəрегез имин, табыннарыгыз мул булсын, хөрмəтле остабикəлəр!

 

Сəхифəне Наилə Жиһаншина əзерлəде.