21.11.2018 Матбугат

“Зыялы булып китеп булмасмы” – Альберт Шакиров ни өчен бүрек белән йөргәнен “Матбугат.ру”га аңлатты

“Юлчы” тапшыруын чыгаручы Альберт Шакиров соңгы вакытта эфирда гел бүрек белән күренә башлады. Ни өчен? “Матбугат.ру”га ул бу стилен үзенчә аңлатты:

“Папаха дип уйлаучылар өчен, бу папаха түгел, бу чын татар бүреге, – диде Альберт, – мин аны түбәтәйгә караганда якынрак атрибут итеп күрәм”.

“Таяну ноктасы” тапшыруында да ул бер-ике тапкыр шушы бүрек белән катнашты. Әмма бина эчендә мондый баш киеме кию ни дәрәҗәдә этикетка туры килә?

“Бина эчендә кигән очракта да бик гөнаһы юк, этикетны бозмый дип уйлыйм үземчә. Ләкин кабинетка, кеше белән шәхси очрашуга килгән чакта салып кулга тотам. Кимим дә, калдырмыйм да”, - ди “юлчы”.

Рабит Батулла “энекәш, бу минем стиль, идеяне урлама” дип шалтыратмыймы дигән сорауга Альберт Шакиров болай диде:

“Рабит Батуллага ияреп кию инде. Шуның кебек зыялы катлам кешесе булып китеп булмасмы дип. Нурбәктә дә (Рабит Батулланың улы – ред.) күренгәли бит бу бүрек. Без барыбер мәдәниятка, мәгърифәткә якын кешеләр саныйбыз үзебезне. Шушы бүрек белән бу өлкә өчен үзебезнең җаваплылыгыбызны теркибез. Тарихи тапшырулар белән генә дә 5 ел шөгыльләнәм бит инде. Аннан тыш проектлар да байтак. Кеше алдында бераз җитдирәк һәм традицион татар чалымнары булган кыяфәт зарур”.

Әти кызы Сәйдә

---
Матбугат.ру
№ --- | 21.11.2018