ТНВда 1 миллион откан Альберт акчасын нәрсәгә тотачак?

«Талант» бәйгесен «Яңа Гасыр» каналы телевидение дөньясына яңа сулыш, яңа идеяләр китерү максатыннан оештырган иде. Җиңүче кешегә ТНВда үз тапшыруын булдыру өчен 1 миллион сумлык акча бирелә. «Яңа Гасыр» каналының PR бүлеге җитәкчесе Ринат Әхмәтҗанов сүзләренчә, каналда бер сезонлык тапшыру әзерләү өчен нәкъ менә шуның кадәр акча кирәк тә инде. Әлеге хокукка Альберт Шакиров ия булды. ТНВ тамашачысына ул «Без тарихта эзлебез» дигән тапшыру аша да таныш.

 

– Альберт тәкъдим иткән тапшыру безнең форматка туры килде. Башка проектлар белән чагыштырганда, ул әзерлек, сыйфат, эчтәлеге ягыннан бер башка өстен иде. Конкурска килгән эшләрнең күбесе блогерлык форматында иде, ул, әлбәттә, телевидениегә туры килми. Конкурсны игълан иткән вакытта Альберт бездә эшләми иде инде. «Юлчы» аның элеккеге тапшыруын да, ТНВның башка программаларын да кабатламаячак. Ул үзгә, авторлык проекты, – диде Ринат Әхмәтҗанов.

 

Миллион откан «Юлчы» тапшыруының беренче сериясе әзер инде. Ул Азнакайның Тымытык авылы турында булачак.

– Тиздән Башкортстанга юл тотачакбыз. Анда Төмәнәк, Килем кебек авыллар бар. Уфаның үзе турында да тапшыру әзерләячәкбез. Соңыннан Оренбург якларына китәргә уйлыйбыз. Анда данлыклы Каргалы авылы бар. Уфа белән Оренбург – татар тарихы, мәгарифе, дине өчен зур урын алып торган җирләр. Тапшыруыбыз тамашачыга ошаса, киләсе сезонга Казахстан белән Үзбәкстанга җыенабыз, – ди Альберт Шакиров.

 

Проект авторы сүзләренчә, соңгы елларда авыл тарихлары белән кызыксынучылар күбәйгән. Шул ук вакытта кайбер авылларның тарихы әле дә архивларда гына саклана.

 

 

– Шул ук Тымытык авылы тарихы кечкенә генә бер юка китапка сыйган. Авыл тарихы Самара белән Уфа архивларында саклана. Әлегә аларны барып өйрәнү өчен мөмкинлек юк. Ул бик күп чыгымнар, вакыт сорый. Шулай ук иске татар, гарәп графикасын укый белүче кеше кирәк. Әлегә тапшырулар авыл аксакаллары истәлекләрен бөртекләп җыеп эшләнә, – ди Альберт Шакиров.

 

ТНВ экранына җырчыларның да эләгәсе килә икән. Нурзадә белән Булат Бәйрәмов та үз проектларын тәкъдим иткәннәр. Ләкин ТНВ җитәкчеләре аларны җиңүче дип игълан итмәде. Булат уен форматындагы шоу эшләмәкче.

 

– Мин үземне җитди тапшыруда күрмим. Шуңа да кәеф күтәрә, ял иттерә торган программа тәкъдим иттем. Анда ике команда бер-берсе белән уйнап ярыша. Әйтик, җырчыларның йөзен махсус программа ярдәмендә картайтабыз да, бу командалар аның кем икәнен белергә тиеш. Кем беренче җавап бирә – шуңа балл өстәлә. ТМТВда барган «Тәмле көрәш» тә үз урынында кала. Без быел аны яңартырга уйлыйбыз, – ди Булат Бәйрәмов.

 

Нурзадә исә элек «Мәйдан» каналында барган «Яшьлегем чишмәләре» тапшыруын ТНВда яңартмакчы.

 

– Әлеге тапшырудан киткәнемә өч-дүрт ел инде, ләкин кая барсам да, «Ник аны син алып бармыйсың», – дип сорыйлар. Үземнең эшләнеп бетмәгән тапшыруларым да калган иде. Исеменнән күренгәнчә, ул җырчы, биюче, композиторлар иҗатының чишмә башы турында булачак. Бары тик иҗат турында гына сөйләшәбез. Танылган кешеләрнең күбесе шәхси тормыш турында сораганнарын яратмый, – ди Нурзадә.

ТНВ җитәкчеләре җиңү яуламаган проектларга да төшенкелеккә бирелмәскә кушты. Киләчәктә алар да экранга чыгарга мөмкин.

 

Фото: ТНВ PR бүлеге