Илназ Сафиуллинның грандиоз туе нәрсә белән истә калачак? (ЭКСКЛЮЗИВ ФОТО ҺӘМ ВИДЕО)

Быелгы көзнең башы үзәккә үткән пенсия реформасы да, татар теле белән бәйле гаугадан соң әллә ни зарыгып көтеп алмаган Белем көне белән дә түгел, ә нәкъ менә популяр җырчы Илназ Сафиуллин һәм аның сөйгәне Айгөлнең грандиоз туйлары белән истә калыр, мөгаен. Илназның Айгөл Хуҗинага май аенда тәкъдим ясавын Матбугат.руда язган идек.

Мәхәббәт дими, ни дисең: июльдә яшьләр никах укытып, бу атнада гөрләтеп туй уздырдылар. Дәрәҗәле кунаклар рәтендә Зәйнәб-Зөфәр, Венера Ганиева, Фирдүс Тямаев, Илсөя Бәдретдинова, Илназ Гарипов, Чулпан Йосыпова, Мөнир Рахмаев, Фәрид Низамиев һәм башкалар катнашкан туй мәҗлесенең чыгымнарын кем күтәргән, яшь парны нинди бүләкләр шаккаттырган, гаилә тормышы эстрада йолдызын үзенә суырып, иҗатына нокта куймасмы - Матбугат.ру Илназ Сафиуллин белән шул сорауларга җавап эзләп эксклюзив әңгәмә корды.

"15 ел иҗат дәверендә меңнән артык туй күргәнмендер, күбесендә җырладым, күпләрен үзем оештырдым. Шуңа да миңа үз туема әзерләнергә җиңелрәк булгандыр дип саныйм, - дип уртаклашты безнең белән Илназ. - Туй чыгымнарын тулаем алганда үзем капладым: 32 яшьлек ир-ат туйга әти-әнисеннән акча алырга тиеш түгелдер. Ике яктан да иң якын кешеләребезнең бәйрәмебездә бары ял итүләрен теләдем. Эшләргә, тырышырга, әзер булып әлеге адымга барырга кирәк. Кредитларга кермәдем, Аллага шөкер! Әлбәттә бүгенге көндә инде тормыш иптәшем булган Айгөлем дә терәк булды, булышты! Булдырдык, туебызны югары дәрәҗәдә башкарып чыктык дип әйтә алам!" - дип сөенә җырчы.