|
|
Бүген кемнәр туган
|
|
Архив
|
13.08.2018 Әдәбият
Студент Адилә Әхмәтҗанова шигырьләреМин, Адилә Әхмәтҗанова, 2001 нче елның апрель аенда Арча районы Кәче авылында дөньяга килгәнмен. Кәче төп гомуми белем мәктәбен тәмамлап, Г. Тукай исемендәге Арча педагогия көллиятенә укырга кердем. Хәзер мин 2 нче курс студенты. Кечкенәдән шигърияткә гашыйк булгангамы, әллә табигатьне һәм тормышны артык яраткангамы, мин уй-фикерләремне шигъри юлларга сала башладым. Шигырьләрем аша, табигатьне һәм тормышны гына тасвирлап калмыйча, дөреслекне ачыкларга һәм үземне борчыган сорауларга җавап эзләргә тырышам.
Яратам
Таң ата...
Алсу күк маныла зәңгәргә...
Шул күккә кулымны сузуым...
Бу бәхет!
Ә мин бит
Яратам...
Дөньяны!
Бер бәйләм чәчкәдәй
Кочакка җыям да,
Яратам...
Таңнарын, төннәрен,
Нур тулы көннәрен
Яратам...
Тынгысыз мизгелләр,
Ирекле хыяллар диңгезен,
Тормышның мин үзен
Яратам...
Яңгырын, карларын,
Күл, елга, тауларын
Яратам...
Кайтаваз саламындөньяга,
Мәхәббәт аңлатам:
"Яраааатаааам!
Сорарсыз: "Ни өчен?"
- Мин яшим, ә димәк, яратам...
9.07.18
Гашыйк җанга ни кирәк соң тагын?
"Яратам!" -дип җитә, әйтү дә.
Сөю тулы, назлы карашыңнан
Мин әзермен, хәтта эрергә.
"Син булганда, мин бәхетле",- дисең,
Нинди рәхәт сүзең тыңларга.
Син янымда булсаң, һич курыкмыйм
Диңгез кичеп, күккә очарга.
Гашыйк җанга күп кирәкми лә соң,
"Яратам!" -дип җитә, әйтү дә.
Ни җитә соң, "Син- минеке,
Мин-синеке, җаным!"-диюгә?!
14.02.18
Сәер халәт...
Аңлашылмый ни сизгәнем...
Сәер гамәл...
Акылымны җиңде йөрәгем...
Сәер сүзләр...
Мин дәшмичә түзмәдем...
Сәер хисләр...
Өметемне өзмәдем...
Сәер тынлык...
Ә мин сине эзләдем...
Сәер үзем...
Яшерен генә сине күзләвем...
Сәер йөрәк...
Ә син мине күрмәдең...
Сәер үзең...
Кабаландың, әллә нишләдең...
Сәер мин, син
Тынлык бозып сүзләр сөйләвем...
Һәм сәер без...
Ә мин менә шулай теләдем!..
29.11.17
Гаеплеме?
Минем дөрес яшәмәвем
Үртәләнә сезнең тарафтан.
Ялгышсам да, тырышамын
Аерырга акны карадан.
Эреп тамган тамчылардан
Ишетсәм мин язгы көйне?
Сез ишетмәс көй булганга,
Мин гаепсез гаеплеме?
Айдан төшкән аз яктылык,
Җитсә нәфсесез күңелгә?
Тик бер сорау: нинди файда
Артык дөрес яшәвемдә?
Дөрес яшәү канунына
Буйсынырга теләгем юк.
Мәгънә тапмыйм өйрәтелгән
Мин яшәүдә, робот булып...
13.03.18
Күзләремнең йомылуын тоеп
Татлы йокы көтүемме? әллә
Уйларымны сәйләннәрдәй тезеп
Җыюыммы озын бер мәрҗәнгә?
Тәрәз ашак ергән ай яктысы
Бүлә кебек төнне ике төскә:
Кап-караңгы төнгә, ак манылган
Куе зәңгәр аксыл сихри кичкә.
Чәчне генә түгел, җанны, хәтта
Сыйпап үткән назлы салмак җилдә,
Аңлый иде төннең төсен, көчен
Һәм борчымый иде беркемне дә...
Йокы белән озак көрәшүче
Күзләремнән йокы качты бермәл.
Тәрәзәдән кергән ай яктысы
Әллә җил гаебе? Белмим төгәл.
Юк дим, нидер дөрес түгел иде
Ышанырлык түгел чынбарлыкка.
Барысы да шундый гади кебек,
Аңлашылмый әмма аңлашып та.
Төннең көчен җил аңлаган төсле,
Мин аңласам, нидер булыр сыман.
Тик мин генә гади чынбарлыкны
Катлауландырам күк юри һаман...
8.08.2018
--- |
Иң күп укылган
|