|
|
Бүген кемнәр туган
|
|
Архив
|
27.07.2018 Авыл
Рушан Гильманов: «Авылда да яшәп була, теләк кенә кирәк»Билгеле булганча, бүгенге көндә авылда яшәүчеләр саны елдан-ел кими. Эш юклык яисә хезмәт хакы аз булу яшьләрне яхшы тормыш эзләп шәһәргә китәргә мәҗбүр итә. Өлкәбезнең башка районнары белән чагыштырганда, Пильна районы татар авылларында бу ситуация башкарак. “Авылда да шәп яшәп була” дип фикер йөртүчеләрнең саны биредә елдан-ел арта бара һәм бу куанычлы күренеш. Петрякста яшәүче Рушан Гильмановны без җирле күмәк хуҗалык кырында очраттык. Ул берничә ел инде туган авылы СПКсында йөртүче булып хезмәт итә.
- Авылда яшәү беркайчан да җиңел булмаган, бүген дә шулай ук. Тырышкан кеше кая да югалмас, миңа калса. Шәһәр тормышы күпләрне кызыксындырса да, анда яшәү тагын да катлаулырак, бәярәк, дип әйтер идем.
Бүгенге заманда авылда да яшәп була, теләк кенә кирәк. Авылда яшәүчеләрнең күбесенең хәл торышы шәһәрнекеләрдән ким түгел бүген, хәтта яхшырак та, - дип сүз башлады Рушан.
Мәктәпне тәмамлап, Ватан каршындагы хәрби бурычын намус белән үтәп кайтканнан соң, Рушан да яшьтәшләре кебек кала тормышын татып карый, әмма ләкин шәһәрнең көндәлек ыгы-зыгысын кабул итә алмый һәм ул туган якларына кайта.
Моннан дүрт ел элек ул сөйгән яры Диляра белән матур гаилә корып җибәрә. Алар әле мәктәптә укыганда ук бер-берсен ошатып йөриләр. Ике йөрәк арасында мәхәббәт уты кабын-ганны үзләре дә сизми калалар. Шулай өч ел хисләрен сынаганнан соң, яшьләр өйләнешергә карар кыла. Бүгенге көндә бәхетләрен тутырып мәхәббәт җимешләре – ягымлы ике кызлары үсеп килә. Өч яшьлек Мадина балалар бакчасына йөри, Саминага әлегә ике ай гына.
Кыр эшләре башлангач, Рушан җирле хуҗалыкта йөртүче булып хезмәт итә, ә гаиләнең төп табышы – күпләп терлек асрау. Кайвакыт аларның мал-туар саны 15-20не уза икән.
Авыл администрациясе билгеләвенчә, шактый яшь булуларына карамастан, Гильмановлар бик эшчән, тырыш гаилә, ә иң мөһиме – авыл җанлылар. Киләсе елга “Яшь гаиләләргә ярдәм” максатчан программасында катнашып, яңа йорт төзү эшен башларга планлаштыралар.“Тырышкан табар, ташка кадак кагар”, - ди халык. Бу нәкъ менә Гильмановлар гаиләсе турында. Аларга бәхетле киләчәк, парлы матур тормыш теләп калабыз.
Румия ХАМЗИНА |
Иң күп укылган
|