|
|
Бүген кемнәр туган
|
|
Архив
|
03.07.2018 Экология
Синоптиклар Татарстанда давыл турында кисәтү таратты
Татарстанда бүген кич һава торышының начараю көтелә. Республика синоптиклары давыл, көчле яңгыр, яшен, бозы явуы турында кисәтә. "3 июль кич, 4 июль төнлә һәм көндез Татарстанда секундына 15-20 метр тизлектәге җил, яшен, көчле яңгыр һәм боз явуы көтелә", - диелә Гидрометеорология үзәге хәбәрендә. Урыны белән җилнең тизелге секундына 24 метрга кадәр җитәргә мөмкин.
Шул ук вакытта эссе һава саклана. Бүген һава температурасы 35 градуска кадәр җитсә, иртәгә максималь температура 30 градус тәшкил итәчәк.
Синоптиклар кисәтүеннән соң Россия Гадәттән тыш хәлләр министрлыгының ТР буенча Баш идарәсе матбугат хезмәте дә иминлек чаралары турында хәбәр таратты.
Гадәттән тыш хәлләр министрлыгы кечкенә судно хуҗаларына - суга керми торырга, машина йөртүчеләргә исә ерак сәфәрләрне кичектерергә һәм торак пункттан читкә чыкмаска киңәш итә.
Моннан тыш, көчле җил вакытында балконнар һәм ишегалларыннан беркетелмәгән әйберләрне алырга кирәк диелә. Тәрәзәләр дә ныклап ябылырга тиеш.
Коткаручылар давылдан йорт диварлары буенда яшеренергә ярамый, дип кисәтә, чөнки түбәдән шифер һ.б. материаллар очып төшәргә мөмкин. Электр тапшыру чыбыклары, юл билгеләре, реклама такталары, витриналардан да ераграк торырга, якын-тирәдәге подъездлар яки йортның подвалында яшеренергә кирәк.
Яшенле яңгыр вакытында электр приборларын сүндерегез, ишек һәм тәрәзәләрне яхшылап ябыгыз, диелә министрлык хәбәрендә.
--- |
Иң күп укылган
|