БУ ЯЗМА ФЛЮРА НИЗАМОВА ТУРЫНДА. ЮЛӘРЛӘР ЙОРТЫ ТУРЫНДА ТҮГЕЛ

"Идел" яшьләр үзәгендә 16 май көнне "Татарстан яшьләре" журналисты Флюра Низамованың (Зөләйха Кыдашева, Гадел Низам) 55 яшьлек юбилее уңаеннан кызыклы очрашу булды. Анда иҗат кешеләре, журналистлар, студентлар катнашты. Флюра апа үзе дә сөйләде, вакыт-вакыт башкаларга да сүз кыстырырга урын калдырды.

ФлЮра апаны тыңлавы бик кызык. Бигрәк тә журналистика һәм сәнгать белән кызыксынган кешегә. Бер сөйли башласа, ул әллә кайларга барып чыга. Шулай итеп, ФлЮра Низамованың заманында ялгышлык белән хәтта юләрләр йортына ябылуы турында да белдек. Бу хәлләрне студентлар да, без журналистлар да авызыбызны ачып тыңладык. Журналистлар дигәннән, кичәдә Илфат Фәйзрахманов ("Безнең гәҗит"), Эльвира Гарипова ("Кәеф ничек?"), Чулпан Фәттахова ("Татарстан яшьләре"), Айгөл Җәләлова ("Кәеф ничек?") бар иде. ФлЮра апаның дуслары - каләм әһелләре Бикә Рәхимова һәм Илсөяр Иксанова да килгән. Бикә апа безнең "Матбугат.ру" сайты белән бик кызыксынды, адресын язып алды.

ФлЮра апа булган җирдә шигырь һәм җырсыз булмый (хәтта сүгенүле бер-ике шигырен дә укыды). Ә кырым татарлары җыры - ФлЮра апаның "коронный" номеры. Шунысын әйтмәгәнмен, "Идел" яшьләр үзәге  Тукай урамындагы бер бизнес-йортта урнашкан. Күрше бүлмәләрдә - төрле фирма офислары. ФлЮра апа тырыша-тырыша кырым татарлары җырын башкарганда нәкъ эш сәгате беткән вакыт иде. Бүлмәдә тынчу булып китте дә, ишекне ачтылар. Коридордан узган һәр кеше аптырап китә. Барысы да миңа карыйлар, чөнки мин - ишеккә иң якын кеше. Мин исә алар алдында сынаттырмадым: бик җитди итеп җыр тыңлаган кыяфәт чыгарып утырдым...

Чулпан Фәттахова фотосы.