Яхшылыклар белән искә алып

Самаралыларны күбрәк Нур¬лат районының Биккол авылы музееннан китерелгән экспо¬натлар күргәзмәсе кызыксындырды. 

- Музей шагыйрь исән чакта ачылган булып, күп экспонатларны ул безгә үзе бирде, - дип, горурланып сөйләде Биккол авылы мәктәбенең татар теле һәм әдәбияты укытучысы, музей җитәкчесе Гөлүсә Әһлиуллина. Ул стенд янына килгән кешеләргә шагыйрьнең авызына каләм кабып язган  язмалары (язуының матурлыгына, пөхтәлегенә ис китәрлек!), рәсемнәре, шәхси әйберләре белән таныштырды. 

 

Гакыйль һәм аның әнисе Хәбибҗамал апа гомеренең шактый зур өлеше узган Кошки районының Иске Җүрәй авылында да аның музей-йортын булдыру турында сүз күптән бара инде. Гакыйльнең шунда җирләнгән булуы да әһәмияткә ия.  Тик әлегә кадәр бу эш чишелешен тапмыйча торган иде. Шушы юбилейда гына бу мәсьәләнең уңай якка хәл ителә башлавы билгеле булды. Самараның “Прогресс - В” төзү компаниясе президенты Вазыйх Мөхәммәтшин: “Татар оешмаларының, “Бердәмлек” газетасының баш мөхәррире Рәфгать Әһлиуллинның соралуын игътибарга алып, Гакыйль Сәгыйровның музеен төзү буенча проект-смета документациясе эшләп чыгарырга куштым. 1 миллион сумнан артыграк акча таләп иткән бу эшләр бушлай эшләнәчәк. Моңардан тыш, музейны төзү өчен смета буенча каралган 6 миллион сумлык төзү эшләрендә дә ярдәм күрсәтәчәкбез. Шулай итеп, без шагыйрьнең музеен төзүгә үз өлешебезне кертәчәкбез”, - дип сөйләде сәхнәдән. Аның сүзләрен тамаша залында утыручылар кайнар алкышларга күмделәр.

 

Татарстан язучылары берлеге әгъзасы, Гаяз Исхакый, Габделҗәббар Кандалый, Шәй¬хи Маннур, Сәхаб Урайский исемендәге әдәби премияләр лауреаты, “Филантроп” халыкара бүләк иясе Гакыйль Сәгыйров 8 китап авторы, танылган рәссам буларак кына түгел, искиткеч түземле, сынмас ихтыярлы, тормыш сөючән кеше була белүе белән дә барыбызга да үрнәк булып кала. Юбилей кичәсендә шагыйрьне якын белгән дуслары чыгыш ясадылар, аның никадәр кешелекле булуы турында сөйләделәр. Мәсәлән, Ульян өлкәсендәге Мөси авылыннан килгән Гөлнәфис Сә¬хабетдинова: “Гакыйль абый белән аралаша башлагач, аның түшәктә ятып авыручы булуын оныта идең. Төпле фикер йөртүе, матур итеп сөйли, вакытлы сорау бирә, сабыр гына тыңлый белүе гаҗәпләндерә иде. Тормышымда берәр кыенлык килеп чыкса, аңа шалтыратып, моң-зарларымны сөйли идем, ә ул акыллы киңәшләре белән бөтен проблемаларымны юк итә иде”, - дип сөйләде. 

 

Шагыйрьнең асыл сыйфатлары үрнәгендә яңа буын ке¬шеләрен тәрбия¬ләргә була. Бу юнәлештә Самарада зур эш алып барыла. Та¬тар¬стан¬ның атказанган укытучысы, Са¬ма¬раның “Яктылык” татар мәктәбендә ана теле һәм әдә¬бияты укытучысы Нурзидә Фәйзуллинаның чыгышы нәкъ шул турыда иде. Ул мәктәптә ша-гыйрьнең иҗатына, тормышына багышланган чаралар үткәрелүе, үзенең классында Гакыйль Сәгыйров почмагын оештыруы турында сөйләде. Аның укучылары - өлкәбездә һәм Татарстанда үткәрелгән татар теле олимпиадаларында  призлы урыннар яулаган Эльмира Мәҗитова (бүген ул үзе дә укытучы һөнәрен үзләштерә инде) һәм Гүзәл Шәкүрова юби¬лярның шигырьләрен укып үттеләр. 

 

Гакыйль Сәгыйровның рухи яктан көчле булуы, тормыш авырлыкларына бирешмәве татарларны гына түгел, башка милләт халыкларын да сок¬ландыра. Чарада өлкә “Туган тел” татар җәмгыяте активисты, Самараның социаль-педагогия көллияте укытучысы Альбина Мәхмүтова  җитәкчелегендә чыгыш ясаган вокаль ансамбль моңа дәлил булып тора. Альбина ханым һәм аның кызы Фәрзәнә, Динара Резвановага кушылып, көллият студентлары Ольга Сурикова,  Антонина Антонюк, Лев Кейль, Александр Панин, вокал һәм фольклор буенча педагог Антонина Мордовская шагыйрьнең сүзләренә язылган “Дусларыма” җырын бик матур башкардылар. 

 

 

Гакыйль Сәгыйровның 80 яшьлек юбилее әнә шулай, җырлар, шигырьләр, ха¬ти¬рә¬ләр белән үрелеп, бик җы¬лы, туганнарча атмосферада үтте. Казан артистлары, Ульян өлкәсе Яңа Малыклы районы Исәнтимер авылыннан килгән Россиянең атказанган мәдәният хезмәткәрләре Гакыйль һәм Рәйсә Шәкүровлар, региональ “Дуслык” иҗади-иҗтимагый оешмасы президенты киңәш¬чесе Идеал Гәләүтдинов (ул чараның сце-нариен да язды, Рәйсә Шәкүрова белән чараны алып та барды), “Ялкынлы яшьлек” халык ансамбле җырчысы, “Халкым минем” конкурсы лау¬реаты Рузалия Хәкимова, Камышлы районы Балыклы авы¬лының Мәдәният йорты мөдире, композитор, җырчы, баянчы Ленар Абсаттаров,  Ульян өлкәсеннән, Нурлаттан, Кошки районының Иске Җүрәй авылыннан килгән "Чишмә" һәм "Ак калфак" фольклор төркем¬нәре, Самараның “Яктылык” татар мәктәбе укучыларының музыкаль чыгышлары бу чараны ямьле итте. Өлкә “Ак калфак” хатын-кызлар оешмасы әгъзалары Әминә Ибәтуллина һәм Асия Шәймарданованың җырлары да бик урынлы булды.

 

Юбилейга шагыйрьне карап тәрбияләгән бертуган энесе Наил, хатыны Халидә, уллары Ринат та килгәннәр иде. Бу аз сүзле һәм тыйнак кешеләр хөрмәтенә сәхнәдән бик күп җылы сүзләр яңгырады. "Абыйны шулай искә алганыгыз, юбилеен зурлап үткәргәнегез өчен бик зур рәхмәт", - дип, Наил әфәнде дә өлкә милли-мәдәни татар автономиясенә, өлкә “Туган тел” татар җәмгыятенә, Самара өлкәсенең региональ “Дуслык” иҗади-иҗтимагый оешмасына,  чараны оештыру комитетына рәхмәтләрен җиткерде. 

 

Ахырда зал дәррәү басып Габдулла Тукайның “Туган тел” җырын күмәкләшеп җыр¬лады. Мөхтәрәм кунаклар белән аралашу “Түбәтәй” тиз туклану челтәре әзерләгән мул өстәлләр артында дәвам итте.

 

Алия АРСЛАНОВА.

Әнәс МИНГАЛИЕВ фотосурәтләре.