«Матбугат.ру» liveinternet статистикасы буенча иң популяр татар сайты дип табылды

Хәер, эш сайтка айлык күпме кеше керүдә мени. Әйтик, сайтыгызга көн дә күпләп яңа кешеләр кергәләп торса, сезнең сайт ай дәвамында бик күп уникаль караучы җыячак. Ә көн дә бер үк кешеләр керсә, айлык уникальләр әз саналачак. Шуңа күрә дә саннарга алданырга ярамый. Безгә кереп чыгучылар түгел, ә даими укучылар кызык. Аллага шөкер, «Матбугат.ру»ның төп байлыгы – даими укучылары. Һәм алар күп.

 

Сайтның уңышында партнерларыбызның да өлеше зур. Беләсез, «Матбугат.ру» дайджест буларак барлыкка килгән ресурс. Бүген инде үз язмаларыбыз, үз мәгълүматларыбыз күбрәк тә. Барлык партнерларыбызга (коммерциялеләренә дә, коммерцияле булмаганнарына да) зур рәхмәтебезне җиткерәбез. «Матбугат.ру»га быел 10 ел тула. Дистә ел буе бюджеттан бер тиен дә алмый көн күрәбез, салым түләүчеләр хисабына яшәмибез. Административ ресурсыбыз да юк, безнең белән хезмәттәшлек итәргә мәҗбүр итә алмыйбыз. Әмма без чын күңелдән һәм укучыларыбыз өчен эшлибез. 

 

Шунысы да бар, бүген “сайтыбызны фәлән кеше укый” дип мактанып утыра торган заман түгел. Бөтен татар сайтлары да трафикны социаль челтәрләрдән “суыра”. Шуңа күрә без сайтка гына ябышып ятмыйчы бар мөмкинлекне кулланабыз. Бүген «Матбугат.ру» ул сайт кына түгел, ә күп интернет-ресурсларны, аккаунтларны, төркемнәрне берләштерүче кечкенә генә бер холдинг. Барысын бергә кушсаң, социаль челтәрләрдә 120 меңнән артык укучыбыз (подписчикларыбыз) бар. Безнең инстаграмга 32 мең кеше язылган һәм көн саен йөзләп кеше өстәлеп бара. 

 

Әмма, югарыда язганча, без сан артыннан кумыйбыз. Саннарның ничек ясалганын да беләбез. Безгә иң мөһиме – үз укучыбыз. Һәр укучыбызга чын күңелдән рәхмәт!)