|
|
Бүген кемнәр туган
|
|
Архив
|
22.01.2018 Матбугат
«Манзара» да «Манзара»: Татарда «Манзара» дигән тапшыру, газета, нәшрият һәм фестиваль бар (ФОТО)“Нәрсә соң ул «Манзара»? Нәрсәне аңлата соң ул?” дигән сүзләр ишетергә туры килә еш кына. Көндәлек татар телендә (кухня телендә дип укы) сөйләшүче милләттәшләребез ә-әз генә әдәбирәк булган сүзләрне аңламыйчарак кала. “Манзара – ул күренеш, хозурланырлык мәйдан” дип аңлатырга туры килә. Бүген исә татарда «Манзара» дигән тапшыру, газета, нәшрият һәм фестиваль бар. Берничә көн элек “Пирамида” залында Айдар Шәймәрдановның “Манзара” премиясе гөрләде. Быел ул инде икенче тапкыр фестиваль дәрәҗәсендә узды. Сәхнәдән җыр сузулар мәйдандагы көрәш белән үрелеп барды.
“Себерке” газетасын чыгаручы Заһид Мәхмүдинең нәшрият йорты да “Манзара” дигән исемдә икән. Кайчандыр “Себерке” - иң зур тиражлы басмалар рәтендә иде. Хәзер саннары бераз төшкән дип беләбез. Әмма “Себерке”дән тыш та “Манзара”да күп басмалар чыга.
ТНВ каналында “Манзара” дигән иртәнге тапшыру чыгып килә. Әмма күпләр аны элеккечә “Хәерле иртә!” дип атый. Гади халык өчен әлеге дә баягы “Манзара” сүзе ятрак булган, күрәсең.
“Ирек мәйданы” газетасы 40 меңгә якын тираж белән чыкса, аның Башкортстандагы аналогы 9300 данә белән дөнья күрә. Нинди исем белән дип уйлыйсыз? Әлбәттә, “Манзара”!
Раиф Усманов чыгаручы бу басмалар элеккеге “Манзара” нәшриятының дәвамчылары. 2000нче еллар башында Раифның “Манзара” дигән нәшрияты булган. Ул газета, еллык календарь, башка басмалар чыгарган. Шул исәптән, “Башваткыч” дигән газетаны да.
Кыскасы, “Манзара”ларда адаша күрмәгез. “Манзара” брендын танытучы нәширләргә, продюсерларга, телевизионщик һәм газетачыларга уңышлар теләп калабыз!
--- |
Иң күп укылган
|