"Әниемне бүләк ит, дидем": Сабыйлар могҗиза көтә - Кыш Бабай гына ишетми

 

Әнә шулай эшләгәндә, бер-береңә ярдәмләшеп, мохтаҗларның күңелен күтәреп, теләген тормышка да ашырып була. Шушы исемдәге фестиваль иң элек Казан шәһәренең Совет районында башланып китә. Ул чакта бу чарада ике интернатта тәрбияләнүче балалар гына катнаша. Тора-бара әлеге фестиваль республика күләменә күтәрелеп, быел унынчы мәртәбә үткәрелде.

 

Быел Казан, Яшел Үзән, Арча, Лаеш, Минзәлә, Нурлат, Питрәч һәм Саба районнарыннан – барлыгы 17 махсус коррекция мәктәбе, балалар йортлары һәм интернатлардан 500дән артык бала килгән иде. Талантлы балалар белән бер сәхнәдә татар эстрадасы артистлары Салават Фәтхетдинов, Гүзәл Уразова, Филүс Каһиров, Фирзәр Мортазин һәм башкалар чыгыш ясады.

 

 – Яңа ел алдыннан ба­лаларның хыялларын тормышка ашыру, аларны мог­җизалар барлыгына ышандыру – бу фестивальнең төп максаты. Үз теләген җиткер­гән сабыйларның берсе дә буш китмәде. Аларга залда утырган һәр кеше шәхси бүләген тапшырды. Монда Президент Аппараты, Министрлар Кабинеты, Дәүләт Советы хезмәткәрләре дә, депутатлар да бар иде. Шулай ук Совет районы тер­риториясендә эш итүче оешмалар да ярдәм итә, – ди Татарстан Президенты ярдәм­чесе Ләйлә Фазлыева.

 

– Бу балаларга сокланмый мөмкин түгел. Әйтик, психоневрология интернатында яшәүче сабыйларны гына алыйк. Беренче елларны алар сәхнәдә бик авырлык белән берәр юл шигырь сөйли иде. Дөрес, аларга бер җыр өйрәнер өчен дә бер ел кирәк. Әмма алар тырышып, яңа үрләр яулый. 

 

Әлеге чараны Дәүләт Советында урнашкан хатын-кыз депутатларның “Мәрхә­мәт” оешмасы үз канаты астына алган. Һәм алар фес­тивальдә катна­шучы­ларның язмышы белән кызыксынып тора.

 

– Аларның һәрберсенең үз хыялы бар. Кемгәдер – балалайка, кайсына уен приставкасы кирәк, кызлар зур ташлы колак алкасы сорый, малайларның вертолет очыртасы килә. Ә бу фестиваль балаларның талантын гына ачып калмый, теләгән теләк­ләрен дә тормышка ашыра, – ди Президент яр­дәм­чесе. Киләсе елда бу сабыйлар гастрольгә дә чыгачак. Бу концертны беренче­ләрдән булып Арча, Питрәч, Лаеш тамашачысы күрә алачак.

 

 

Кичә Казанда республи­каның төрле районнарында яшәүче күп балалы, аз керем­ле, талантлы балалар өчен Яңа ел тамашасы күрсәтте­ләр. Әлеге чараны “Мәрхә­мәт” оешмасы оештырды.

 

– Дүртенче ел рәттән “Әки­ят” курчак театры кол­лективының Яңа ел тамашасын күп балалы гаиләләргә бүләк итәбез. Араларында авыр яшәүчеләр, тәрбиягә алынганнары да бар. Башта алар чыршы тирәли әйләнә­ләр, аннан соң әкият карыйлар. Аларның һәрберсенә Кыш бабай күчтәнәч тә әзер­ләгән, – ди Татьяна Ларионова.

 

Тамашачылар арасында “Ватаным Татарстан” газетасында язмышлары яктыртылган гаиләләр дә бар иде. Лаеш районының Усад бис­тәсендә яшәүче Алсу Вә­лие­ва бирегә тәрбиягә алган сабыйлары белән кил­гән. “Балалар өчен нинди зур бәй­рәм ясаганнар. Мондый чыршыны күрү үзе генә ни тора. Әнә ничек шатланалар”, – ди ул, сабыйларына карап.

 

Яшел Үзән районының Норлат авылыннан Рәйсә Миң­нуллина җиде сабыен алып килгән. “Районнан 44 бала килде. Шуларның 25е – балалар йортында тәр­бия­ләнә. Калганнары – гаилә­ләрдә яшәүчеләр. Мондый бәйрәм ясаганнары өчен без Татьяна Ларионова җитәк­челегендәге депутатларга рәхмәтле”, – ди ул.

 

Ә сабыйлар, әйткәнемчә, могҗиза көтә, нидер буласына ышана. Әнә Кирилл исемле малай Кыш бабайга күптән хат язган. Аңа зур конструктор кирәк икән. Ә менә Даша исемле кыз: “Әниемне бүләк ит, дидем. Ничә еллар бу теләкне телим инде. Нигәдер Кыш бабай гына ишетми”,– ди. Хыяллар чынга ашмый калмас, дип ышанасы килә.