"БЕЛЕМ ҖӘҮҺӘРЛӘРЕ – 2010" ИНТЕРНЕТ САЙТЛАРЫ БӘЙГЕСЕ СТАРТ АЛДЫ

Бүген интернет челтәрендә яңа бәйге старт алды. "Белем җәүһәрләре – 2010" дип аталучы әлеге I Халыкара интернет-проектлар бәйгесе татар телендә ясалган һәм мәгариф өлкәсе белән бәйле булган барлык интернет-ресурсларны барлау, аларны популярлаштыру, әлеге ресурс авторларына ярдәм күрсәтү максатыннан, "Белем.ру" җаваплылыгы чикләнгән җәмгыяте инициативасы һәм Татарстан Республикасы Мәгариф һәм фән министрлыгы ярдәме белән оештырыла.

Бәйгедә барлыгы 7 номинация:

"Укытучы – җәүһәр" номинациясе. Әлеге номинациядә укытучы шәхесенә багышланган яисә укытучының үз эшчәнлегенә багышлап үзе ясаган интернет-ресурслар катнашалар.

"Укучы – җәүһәр" номинациясе. Әлеге номинациядә укучылар ясаган һәм белем алу белән бәйле булган үз эшчәнлекләрен чагылдырган интернет-ресурслар катнашалар.

"Тематик ресурс – иҗади җәүһәр" номинациясе. Әлеге номинациядә фәнни өлкәдә билгеле бер темага багышланган, үз эзләнүләрен дә керткән интернет-ресурслар катнашалар.

"Башлангыч белем учреждениесе – җәүһәрләр чыганагы" номинациясе. Әлеге номинациядә балалар бакчалары һәм башлангыч мәктәп тормышын чагылдырган интернет-ресурслар катнашалар.

"Урта белем учреждениесе – җәүһәрләр чыганагы" номинациясе. Әлеге номинациядә урта гомуми белем бирүче мәктәп тормышын чагылдырган интернет-ресурслар катнашалар.

"Югары уку йорты – җәүһәрләр чыганагы" номинациясе. Әлеге номинациядә махсус урта, югары уку йортлары тормышын чагылдырган интернет-ресурслар катнашалар.

"Белемле гаилә – нур чәчүче җәүһәр" номинациясе. Әлеге номинациядә бердәм гаилә ясаган, интернет-кулланучылар өчен файдалы мәгълүмат чыганагы булган интернет-ресурслар катнашалар.

Конкурс http://konkurs.belem.ru адресы буенча урнашкан.

Укытучылар елына багышланган әлеге бәйгенең киләчәктә дә җәүһәрләребезне күтәреп чыгуын, халкыбызның асылташларын ялтыратуын теләп калабыз.