Алмаз Хәмзин белән башка бер чәй өстәленә утырмыйм!

Башка редакция хезмәткәрләре яратып йөри анда. Шулардан дөнья хәлләрен, соңгы яңалыкларны, имеш-мимешләрне дә ишетәсең. Бер көнне шулай каһвә аларга чират торганда яныбызга Алмаз Хәмзин килеп басты. «Кызлар, бер җылы сүз әйтегез инде», – ди. Нәрсә әйтеп, салпы якка салам кыстырырга икән дип уйлап торганда, язучы үзе: «Хаммам», – ди. Баксаң, берничә ай элек юмор остасының улы белән кызы әтиләренә фитнес клубка абонимент бүләк иткән, ләкин бу шәһәрдә кайнар су беткән вакытка туры килгән. Тегендә бассейнда да, душта да су бик салкын, бердәнбер җылы урын сауна икән. Алмаз абый рәхәтләнеп йөзә дә алмаган, барып, аркасын җылытып утыра да, кайтып китә икән. «Хәзер башка фитнес үзәккә йөрим. Анысында хаммамнан тыш, кар бүлмәсе дә бар. Саунадан соң шунда аунап чыгам, чыныгам», – диде ул.

 

Алмаз абый белән чиратта тору үзе бер рәхәт, аның авызына карап торып, вакыт узганын сизми дә каласың. Ә менә бер өстәл артына утырып чәй эчәргә киңәш итмәс идем. Ул көнне дә, кеше күп булу сәбәпле, бергә утырдык. Язучы өстенә каймак салынган белен белән чәй алды, без – каһвә. Алмаз абый тәмләп ашый-ашый сөйләвен дәвам итте. «Берсендә монда кермичә, ашханәгә төштем, – ди. – Борын очында – күзлегем. Кызлар, Алмаз абый, ниләп күзлек киеп төштегез дип, бәйләнгәч, «мин әйтәм, күзлекнең диоптриясе көчле, сезнең кәтлитләрегез берничә мәртәбә зур булып күренә дә, ашагач, тамагым да туйган кебек тоела, дидем. Шуннан бирле кәтлитләрен зуррак итеп ясый башладылар бит». Кызлар бүрәнә ярыгыннан да көлә дигәйдән, Алмаз абыйны күзлек турындагы мәзәгеннән тәмам тәгәрәдек. Эч катканчы көлеп, каһвәнең тәмен дә белми калдык. Моннан соң юмор остасы белән башка бер өстәлгә утырмыйбыз дип редакциябезгә менеп киттек.

 

Бер минут көлү фәлән кило сарык ите ашауга тиң, диләр. Алмаз Хәмзин мәзәкләреннән елаганчы көлеп, яшәрү сеансы узасыгыз килсә, 16 декабрь көнне Татар Дәүләт филармония залына рәхим итегез. Ул анда тамашачыны үзенең иҗат кичәсенә көтеп кала. Безне дә чакырды. «Сез барыбер килмисез, шуңа чакырам», – диде елмаеп.