ИНТЕРНЕТ ЮЛДАН ЯЗДЫРА?

Беркөнне кызым мәктәптән бик кәефсезләнеп кайтып керде. Ни булды дип сорагач та ачылып китәргә ашыкмады. Соңыннан гына бер-ике җөмлә белән четерекле хәлгә таруын сөйләп бирде. Ул бер ел элек намаз укый башлаган иде, мөслимәләрчә киенеп, башына яулык ябып йөрсә дә, исламда нәрсәнең рөхсәт ителгәнен, нәрсәнең юклыгын бик белеп бетерми әле.

Иптәш кызлары кебек үк «odnoklassniki»да да утыра. Утыра торгач, башка мәктәптә укучы бер малай белән танышкан, анысы да дин тота икән. Уртак темалар табылып, ныклап торып аралаша башлаганнар болар. Һәм менә бәла: егетнең сыйныфташлары, аның челтәрдәге битенә үтеп кереп, кыз белән ике арада барган язышуларны укыганнар. Шул көннән бирле кызымның ашавы – ашау, йокысы йокы түгел икән. Без бит инде кеше ни әйтер дип, кешедән куркып яшәгән буын. Телемә килгән беренче соравым:

– Ни турыда язышкан идегез соң? – булды.

– Күбесенчә ЕГЭ турында инде...

– Соң шулай булгач, нидән куркасың?

Кызымның:

– Гарьләндерә, аннан бигрәк Аллаһы Тәгаләнең җәзасыннан куркам, – дигән сүзләрен ишетеп, бөтенләй аптырап калдым. Чөнки мин монда гарьләнерлек берни дә күрмим. Аннары ике яшь кешенең челтәрдә аралашуында нинди гөнаһ булсын икән? Гөнаһ саналса, махсус мөселман челтәрләре уйлап тапмаслар иде.

Әмма кызыма боларны әйтергә ашыкмадым. Яшьләрнең дингә шулкадәр дә сак мөнәсәбәте мине һәрчак сокландыра, хөрмәт уята, шул хисләргә зыян китерермен дип курыктым. Шулай итеп, «кызымны Аллаһының нинди җәзасы көтүен» ачыкларга булдым.

Дин белгечләре хәзерге вакытта интернетның ислам гыйлемен таратуда мөһим роль уйнавын инкарь итмиләр, шул ук вакытта челтәрнең исламда тыелган нәрсәләрне таратуга сәбәпче булып торуын да әйтәләр. Алар фикеренчә, мөселман белән мөслимә аралашканда кайбер шартлар үтәлергә, ягъни сөйләшүнең темасы уку, уртак эш мәсьәләләренә генә кагылышлы булырга; тавышлы видео-сервиста яисә социаль челтәрдәге фотода мөслимә хиджабтан булырга тиеш икән.

Киемгә кагылышлысын үтәү авыр булмас анысы. Ә менә аралашу үзе гөнаһлы юлга алып кереп китәргә дә мөмкин, ди. Чөнки яшь егет белән кыз аралашканда алар арасында башта дуслык, аннары бер-берсенә ияләшү, мавыгу кебек хисләр уянуы табигый хәл бит. Бу, никахлашу максаты куелмаган очракта, зур гөнаһ санала. Аннары иманы зәгыйфьрәк булган кешенең, шайтан коткысына бирелеп, тыелган темаларга сөйләшәсе килү теләге дә туарга мөмкин («...шайтан үзенә ияргән кешене фәхеш вә гөнаһлы эшләрне эшләргә өндәр...» «Нур» сүрәсе, 21 нче аять). Ә социаль челтәрдә чикләү, контроль дигән нәрсә юк, теләсә нәрсә яза аласың. Тагын шунысы да бар: челтәр яшьләрне еш кына алдашырга да этәрә. «Дәрес карыйсы урында тагын кем белән язышып утырасың инде?» – дигән сорауга кайсы егет яки кыз әти-әнисенә дөресен әйтер икән.

Шулай итеп, мөслимәләргә мөселман егетләре белән интернет аша аралашырга ярыймы, юкмы, дигән сорауга җавап табылды: яравын ярый, әмма чик сызыгын үтмәүгә ышанычың юк икән, аралашмавың хәерле. Танылган ислам дине галиме шәех Мөхәммәд Салих әл-Мөнәдҗитнең дә: «Мөслимәнең интернеттан файдалануында гөнаһ юк, ә егетләр һәм кызларның бер-берләренә ияләшүләре, дуслык элемтәләре урнаштырулары тыела», – дигән сүзләре бар.