12.10.2017 Мәдәният

Нәҗибә Ихсанова: 80 яшьтә дә эшемә йөри алгач, Ходайга рәхмәт кенә диясе

Камал театры артисты Нәҗибә Ихсанованың 80 яшьлек юбилее якынлаша (ул 1938 елның 25 гыйнварында Татарстанның Азнакай районы Буралы авылында туган). Тугызынчы дистәгә аяк басарга җыенса да, Нәҗибә апа зарланмый. Көн саен диярлек эшкә йөри.

— Хәзер рольләрем аз. Картлык үзенекен итә. Яшьлектәге кебек, бөтенесенә алынып булмый. Әмма гомер буе шушы театрда кайнагач, спектакльдә уйнамаган көннәрдә дә Камалга барып, “җилләнеп” кайтасы килә, — ди Нәҗибә апа. — Аның җылы атмосферасында үземә рәхәтлек алам! Мәскәүдә Щепкин исемендәге театр училищесын тәмамлап кайткан көннән — 1961 елдан бирле Камал театрында бит. 60 елга якын гомер шунда узган. Аз түгел!

— Нәҗибә апа, 6 октябрьдә Камал театры “Зәңгәр шәл” белән сезонны ачты. Сезне быел кайсы спектакльләрдә күрергә мөмкин булачак?

— 60 елга якын эшчәнлек дәверендә күп рольләр башкардым. “Кыю кызлар”, “Алты кызга бер кияү”, “Үзебез сайлаган язмыш”, “Баскетболист”, “Дивана”, “Әни килде”... — аларны санап бетерә торган түгел. Әмма 80 яшькә җиткәндә, картлык үзен сиздерә. Хәтер сыната башлады. Шуңа күп спектакльдә катнашмыйм. “Зәңгәр шәл”дә генә уйнавымны дәвам итәм. “Гөргөри кияүләре”ннән дә баш тарттым. Чөнки башкарып чыгу кыенрак.

— Сәламәтлек ничек?

— Аллага шөкер. 80 яшьтә дә эшемә йөри алгач, Ходайга рәхмәт кенә диясе. Табибларга даими күренеп торам. Бөтен җирем сәламәт. Гомер буе сәхнәдә, хәрәкәттә булуым да зур роль уйныйдыр. Әйткәнемчә, хәтер ягы гына аксый. Әмма бөтен яклап камил булып бетә алмый инде, шуның өчен картлык бит ул.

Лилия ЙОСЫПОВА
Ирек мәйданы
№ --- | 12.10.2017